4 feb 2015

ANOVA OGROBE APOSTA POLA UNIDADE DE ACCIÓN MÁIS ALÁ DE AGE



DENDE ANOVA DESMENTIMOS A NOTICIA PUBLICADA NA PRENSA O 4 DE FEBREIRO E INDICAMOS QUE NA ASEMBLEA LOCAL APROBOUSE POR UNANIMIDADE APOIAR A INICIATIVA CIDADÁ SOMOS MAIORÍA.
 

A asemblea local de Anova Ogrobe, na súa xuntanza do 13 de agosto, acordou por absoluta unanimidade apostar pola fórmula de participar nas eleccións locais a través dunha marea cidadá ou dunha candidatura de unidade. Esta decisión viuse referendada polo acordo marco que a nivel nacional se adoptou na Conferencia sobre política municipal de Anova en Vigo o pasado 24 de xaneiro.

En Ogrobe, Anova decidíu non presentar lista electoral propia e si apoiar sen reservas as iniciativas e propostas da iniciativa cidadá Somos Maioría, en base ó acordo tomado, tamén por absoluta unanimidade, na súa asemblea do 7 de novembro. Iniciativa cidadá que está a realizar unha intensa e boa labor no referente á crítica urbanística e que ten este venres día 5 unha asemblea onde comezarán a elabora-lo seu programa electoral sempre coa transparencia e a defensa do público e do pobo como prioridade.

Negamos pois, de xeito rotundo, a publicación que neste xornal se realizou referente a unha coalición electoral na que Alternativa Galega de esquerdas tería presenza non noso pobo o vindeiro mes de maio.

Dende o verán, a asemblea local de Anova tentou busca-la unidade de acción da oposición meca, en clave de esquerda e nacionalista, pois consideramos que as dúas variables se poden e se deben conxugar nun momento de crise como o actual para facerlle fronte ás políticas corruptas e empobrecedoras dos gobernos do PP. Así, xa no verán iniciamos unha rolda de contactos con Compromiso por Galicia, Bloque Nacionalista Galego, Esquerda Unida e Podemos, da que obtivemos a predisposición de todos a seguir falando e buscando uns mínimos comúns denominadores. Co devir do tempo, xurdiron na nosa vila expresións cívicas como a iniciativa cidadá Somos Maioría, á que sen ningún tipo de problema nin contrapartida apoiamos, pois no seu manifesto comparten esas dúas variables fundamentais: esquerda e defensa de todo o relativo ó noso país.

Se ben, Esquerda Unida tentou conformar unha coalición no noso pobo en base ó modelo AGE, dende Anova sempre pensamos que sería insuficiente e que, na situación actual da nosa localidade, se facía imprescindible un exercicio de xenerosidade e de maior inclusión, contando coas forzas citadas anteriormente. Desgraciadamente, a forza esquerdista negouse en rotundo a cede-las súas cotas de poder e a apoiar unha iniciativa cidadá e apartidaria como Somos Maioría, que si conta co apoio explícito de Anova e CxG, así como coa participación de persoas do círculo de Podemos O Grove. Pero sen dúbida o fundamental e principal de Somos Maioría é a capacidade de activar a tantos e tantas que ata o de agora non decidiran involucrarse na política activa a nivel local, condición imprescindible para cambia-las cousas a mellor.

Para finalizar, desexamos expresar a necesidade de seguir construíndo espazos compartidos onde ninguén teña o control e onde todos sexan copartícipes dos éxitos e dos fracasos a partes iguais. Necesitamos, no noso pobo e no noso país, de iniciativas onde as confusións e as liortas se troquen por cooperación e boa vontade na busca dunha unidade de acción capaz de mellora-la realidade na que vivimos. É por iso que seguimos convidando tanto a Esquerda Unida como ó Bloque Nacionalista Galego a seguir explorando esa vía que a iniciativa cidadá Somos Maioría significa. Desexamos, polo tanto, que, sexa quen for, non tente intoxicar nin enganar á cidadanía con comunicados e notas de prensa que antes que construír só pretenden embarra-lo panorama político local de cara ás eleccións municipais de maio. Está moito en xogo, está o noso pobo en xogo...teñamos altura de miras!
 

 

Anxo López, Coordinador local de Anova Ogrobe.
Ricardo Garrido, Portavoz local de Anova Ogrobe.

Ogrobe, a xoves 5 de febreiro de 2015.

28 nov 2014

SOMOS MAIORÍA: A CIDADANÍA DONA DO SEU FUTURO



ANOVA OGROBE ANIMA A PARTICIPAR ACTIVAMENTE NA INICIATIVA CIDADÁ SOMOS MAIORÍA


A asemblea local de Anova – Irmandade Nacionalista en Ogrobe acordou na súa última xuntanza apoiar e que a súa militancia participe na iniciativa cidadá Somos Maioría. 
 
É coñecido que a finais do verán Anova Ogrobe convidara ó conxunto das forzas nacionalistas e da esquerda na oposición do noso concello a tentar conseguir unha unidade de acción de cara ás eleccións municipais do vindeiro ano, tentando acadar unha única lista apoiada por BNG, EU, CxG, Podemos e a propia Anova, dándolle o protagonismo non a estas formacións políticas, senón á cidadanía. Posteriormente xurdiu no noso pobo este proceso de participación cidadá que comparte amplamente as nosas inquedanzas políticas e metodolóxicas, tanto a nivel local como a nivel nacional.
 
Dende Anova Ogrobe pretendimos dende o primeiro momento construír un proxecto político de abaixo cara arriba, que lle dese o protagonismo á cidadanía en clave de esquerda e de país. Vemos que no noso pobo existen determinados problemas que os partidos políticos non son quen de solucionar, pero si que a cidadanía autorganizada puido e pode. Tanto as demandas de reforma do colexio Rosalía de Castro impulsada pola súa ANPA, como a defensa do medioambiente protagonizada pola Plataforma contra o campo de golf na Siradella, así como as demandas das nais e pais na Gardería de Rons, etc son claros exemplos de como ante a necesidade, o noso pobo ten capacidade de organización e defensa dos nosos dereitos. 

Na actualidade vemos como a nefasta xestión do tripartito presidido por Miguel Ángel Pérez nos agasalla cun novo problema, o PXOM. Novamente é a cidadanía a que, a través da Plataforma de afectados polo PXOM sae á rúa a defende-los nosos dereitos. Ante todos estes exemplos, e no actual escenario político no que o bipartidismo que nos trouxo ata este contexto de crise sistémica amósase incapaz de recuperar a senda do crecemento e do reparto xusto da riqueza, así como de solucionar os principais problemas dos grovenses en tanto que galegos, a iniciativa cidadá Somos Maioría semella unha ferramenta perfectamente válida para alcanzar a tan demandada unidade de acción para a defensa dos intereses dos quen máis padecemos esta crise.


Por todo isto, Anova – Irmandade Nacionalista en Ogrobe convida a participar na asemblea deste sábado 28 de novembro que terá lugar na Casa da Cultura Manuel Lueiro Rei, convocada pola iniciativa cidadá Somos Maioría a partires das 18:00h.


Anxo López Vale.
Coordinador local de Anova – Irmandade Nacionalista en Ogrobe.
Ricardo Garrido.
Voceiro local de Anova – Irmandade Nacionalista en Ogrobe.

2 sept 2014

BOAS SENSACIÓNS...



ANOVA OGROBE VALORA POSITIVAMENTE A RECEPCIÓN DA PROPOSTA DE UNIDADE DA ESQUERDA E DO NACIONALISMO EN OGROBE

Durante estes últimos sete días, a proposta lanzada dende a asemblea local de Anova – Irmandade Nacionalista en Ogrobe tivo unha acollida positiva pola totalidade das forzas convidadas. As liñas propostas de reactivación social e económica do Concello, de transparencia e participación cidadá, de cambio de rumbo das institucións e da vida económica e política da localidade e o seu entorno son básicas para tódalas forzas da esquerda e do nacionalismo galego. Do mesmo xeito, estas premisas básicas fan evidente que a unidade é algo que a sociedade tamén ve con bos ollos e agradece. 
 
Nestes días, foron moitas e diversas as mostras de apoio á iniciativa que busca abrir un espazo participativo que protagonice a cidadanía á hora de construír programa, elixir candidatas e candidatos, sinalar os déficits máis urxentes da localidade, favorecer ós puntos fortes que a sociedade e a península de Ogrobe ten, etc.

Tanto Compromiso por Galicia como Podemos comparten expresamente a proposta de inclusión e participación humilde e honesta. Agardamos que ese mesmo camiño sexa o seguido tanto por BNG como por EU. Ámba–las  dúas forzas dependen do que a súa militancia decida no seo das súas respectivas asembleas. Convidamo–las, polo tanto, a que coparticipen deste proceso de empoderamento cidadá. De feito, este mesmo mércores, EU organiza unha asemblea aberta na que dende Anova – Irmandade Nacionalista en Ogrobe, agardamos que sexa o lugar e o momento no que a súa militancia e base social den ese tan agardado paso.


Entendemos que é o momento de que a cidadanía tome a iniciativa e dende abaixo. Organicemos plataformas cívicas a prol da creba democrática e trasladado á instancia política polas forzas rupturistas que realmente conecten con esa cidadanía.

Detectamos que non é un tema que só preocupe ós partidos políticos, senón que está a xerar un intenso debate que non é máis que a mostra das ganas que a cidadanía ten de participar nos asuntos que máis lle afectan no día a día: orzamentos, axudas a asociacións de veciños e asociacións deportivas, ocio e cultura sustentable, estado das instalacións públicas, etc. Non debemos esquecer que a vida política local sempre propuxo dende hai décadas piscinas, pavillóns, auditorios, centros de día... e sempre foron os intereses de catro os que impediron a consecución destas demandas.

A tan comentada reforma electoral do PP non é máis que outro motivo máis para favorecer este proceso que busca a unidade de acción dos partidos para que sexa a xente a verdadeira dona do seu destino.

26 ago 2014

ABRIMOS ENTRE TODAS E TODOS UN PROCESO POR E PARA A CIDADANÍA?



ANOVA OGROBE FAI UN CHAMAMENTO ÁS FORZAS NACIONALISTAS E DE ESQUERDAS CON PRESENZA EN OGROBE: POLA UNIDADE DE ACCIÓN EN DEFENSA DAS MAIORÍAS SOCIAIS



Nós, cidadáns e cidadás galegas, militantes de Anova - Irmandade nacionalista en Ogrobe, conscientes do enorme deterioro social, político e económico que estamos a sufrir como consecuencia das políticas de austeridade impostas dende as instancias económicas e políticas internacionais; conscientes das limitacións democráticas do réxime bipartito nacido na Transición; conscientes da renuncia por parte das institucións galegas (incluidos os concellos gobernados polo PP como o noso) á defensa dos sectores máis agredidos e dos sectores produtivos,conscientes da situación de emerxencia na que nos atopamos, así como de que entre as instancias ás que apelamos hai máis puntos de encontro que de discrepancia e conscientes da necesidade imperiosa de retirar do poder municipal aos partidos do réxime, e combatir o pucherazo preelectoral que o PP quere enmascarar nunha reforma da Lei Orgánica de Réxime Electoral Xeral, facemos este chamamento á cidadanía meca e especialmente a Bloque Nacionalista Galego, Compromiso por Galicia, Esquerda Unida e Podemos: 

• Rexenerar a democracia no Concello de Ogrobe para acabar coa corrupción sistémica dos actuais membros do goberno municipal.
• Defender dende as instancias municipais aos sectores máis agredidos polas políticas de recortes e eliminación nas prestacións sociais, sanidade, ensino, cultura...
• Impulsar políticas de ordenamento do territorio sometidas a criterios racionais e de respecto polo medio ambiente, polo patrimonio histórico...
• Abrir o Concello de Ogrobe á participación cidadá, sen atrancos e coa transparencia como sinal de identidade.

Para lograr estes obxectivos é necesaria máis que nunca a unidade de acción do nacionalismo e da esquerda baixo a fórmula de Candidaturas Cívicas ou Frontes Amplas co obxectivo de abrir paso a un proceso constituínte galego no que a soberanía nacional se exerza polo pobo, soberanía popular.

Tras o test das Europeas, contando o bipartidismo con menos do 50% e co avanzo de movementos cívicos tal como pensamos en Anova cando propugnamos a Fronte Ampla non excluínte, entendemos que esa segue a ser a alternativa para Galiza, para conquistar a democracia real.

Entendemos que é o momento de que a cidadanía tome a iniciativa e dende abaixo. Organicemos plataformas cívicas a prol da creba democrática e trasladado á instancia política polas forzas rupturistas que realmente conecten con esa cidadanía.

Consideramos urxente seguir propugnando na Galiza Frontes Amplas, dende abaixo, sabendo que temos que concordar coa maioría social, ese 99% que dun xeito ou doutro sofre as políticas da plutocracia estafadora.

Por iso:
Acordamos tecer, propoñer e participar en Ogrobe en redes cidadáns que establezan os alicerces para iniciativas políticas de unidade popular para o futuro inmediato, mesmo electorais, como método de acción política.

Nun primeiro chanzo, convidamos ós partidos ó Bloque Nacionalista Galego, a Compromiso por Galicia, a Esquerda Unida e a Podemos a sumar e priorizar o que nos une e non  o que nos separa. Para iso pensamos que sería positivo ter unha xuntanza deliberativa para ver as posibilidades da conformación dun proceso aberto, impulsado por estes actores políticos que lle dea á cidadanía a palabra nas vindeiras eleccións locais. 

Trataríase de que o conxunto do pobo de Ogrobe máis comprometido puidese elixir en primarias ós seus candidatos e ás súas candidatas, que puidesen participar e aprobar o programa electoral dun frente cívico que apoiase os intereses do pobo antes que o dos poderes económicos, etc.