O CONCELLEIRO DE CULTURA DE OGROBE: O NOSO WERT

INCOMPETENCIA, FALTA DE INTERLOCUCIÓN COA INDUSTRIA CULTURAL E RECORTES SON O RESUMO DA ACTIVIDADE DE CARLOS OTERO Ó FRONTE DA CONCELLERÍA DE CULTURA.

Xa fai máis de dous anos que o actual tripartito liderado polo Partido Popular de Miguel Ángel Pérez chegou á Casa do Concello para ser outro boneco de ventrílocuo da Troika e dos intereses do capital financeiro. As expectativas que moitas e moitos veciños tiñamos do trío Pérez – Ayda – Fredy non eran moitas pero cada vez retrátanse máis, non por realizar mal o seu traballo, que tamén, senón polo que deixan de facer.

Se ben a concelleira Ayda Filgueira leva o premio á muller máis ociosa nas súas responsabilidades ó fronte dunha concellería, o premio en categoría masculina é para o concelleiro de cultura, o señor Otero.

Nestes pouco máis de dous anos de exercicio da súa responsabilidade ó fronte da promoción da cultura no Concello de Ogrobe, o mundo cultural non se beneficiou en practicamente nada das súas propostas. Neste punto, hai que agradecer ós diversos establecementos e asociacións que fan que a cultura no noso pobo siga a existir, xa que si fose polo concelleiro Otero aínda estaríamos agardando a primeira iniciativa merecedora dese nome.

Non pode ser que en tempos de crise se recorte en educación e en sanidade, pero tampouco en cultura, pois esta non é un ben de luxo, senón un dereito de tódolos cidadáns e que permite unha vida máis próspera e saudable. O descendo das subvencións a asociacións culturais ou ós servizo de normalización lingüística seguen a liña marcada por este concelleiro e o goberno do Partido Popular na busca dunha sociedade máis gris e apática, na que o recorte de dereitos e liberdades sexa máis sinxela.

Tampouco é viable que a práctica totalidade da ínfima programación cultural realizada polo Concello sexa a baseada no tradicionalismo e no folclore. Recentes estudos como o  de Anne-Marie Thiesse, amosan que son os réximes totalitarios os que máis enfatizan as políticas culturais neste senso. Así, a científica social di que: “O movemento Kraft durch Freude na Alemania nazi e o Dopolavoro fascista na Italia de Mussolini, monopolizaban a organización do tempo destinado ó ocio, relizando unha cantidade de manifestacións folclóricas e multiplicando os grupos de canto e danza tradicionais.” Se ben é certo que dende Anova – Irmandade Nacionalista en Ogrobe respectamos e apoiamos todo tipo de manifestación cultural, tamén é certo que demandamos unha maior diversidade nos estilos e nas temáticas programadas pola concellería de cultura.

Suxerímoslle ó señor Carlos Otero que dispoña de locais municipais como lugares de ensaio para os diversos grupos existentes na localidade, suxerímoslle tamén que diversifique os usos da Casa da Cultura Manuel Lueiro Rei, respectándose entre si as diferentes actividades e usos que se lle poden dar. Referente á Casa da Cultura, é preciso denunciar o empeoramento do servizo respecto doutros anos, pois si ben a biblioteca ten estado aberta polas tardes do verán con anteriores gobernos e incluso tamén as mañás do sábado, este ano os cidadáns de Ogrobe non puidemos desfrutar destas instalacións nesas horas, restrinxindo un dos dereitos máis básicos como é o do acceso á cultura. Outra das suxerencias que dende Anova – Irmandade Nacionalista en Ogrobe lle facemos ó concelleiro Otero é a maior e mellor coordinación cos diversos establecementos que realizan actividades culturais no noso pobo, verdadeiro motor da música e do ocio en Ogrobe.

En definitiva, as expectativas dos cidadáns de Ogrobe nestes tempos de crise respecto das políticas realizadas dende o Concello son que favorezan o crecemento económico e a diversidade cultural, pois é a cultura, entre outros factores, o que pode axudara desetacionaliza-lo turismo e, como consecuencia, favorecer o descenso do desemprego na localidade.

Anxo López.
Responsable acción social Anova – Irmandade Nacionalista en Ogrobe.

Ricardo Garrido.

Coordinador local Anova – Irmandade Nacionalista en Ogrobe.

NEPOTISMO E FALTA DE ÉTICA NO PP DE OGROBE E NOS SEUS SOCIOS DE GOBERNO

ANOVA – IRMANDADE NACIONALISTA EN OGROBE DENUNCIA A INDECENCIA QUE SUPÓN QUE O GOBERNO TRIPARTITO USE O CONCELLO COMO AXENCIA DE COLOCACIÓN PARA FAMILIARES E AMIGOS.

Fai uns días publicábase nun portal de información local, un alarde de cinismo máis ao que xa nos ten acostumados o Goberno municipal, no que xustificaban a amortización de varios postos de traballo de limpeza, para non ter que subir a taxa de lixo, cando no mes de setembro de este mesmo ano aprobaron no Pleno municipal, e en solitario, unha suba de esta taxa nun 12%.

Nun pobo onde a índice de paro supera o nivel estatal, este feito considerámo-lo un despropósito por parte do Goberno de Miguel Ángel Pérez, e máis cando fai uns día aprobaron concederlle unha dedicación exclusiva a unha Concelleira, famosa pola súa inactividade, có único fin de

pedir unha excedencia no seu traballo e evitar un traslado laboral. Cambio de status que lle suporá un aumento de 16.000€.

Dende a Asemblea de Anova – Irmandade Nacionalista en Ogrobe consideramos ó Goberno municipal totalmente “resignado” a que este problema do paro no noso pobo só atope respiro nos meses de verán, cando dende Anova estamos ofrecéndolle alternativas á creación de traballo estable e para todo o ano, como é a proposta do Centro de Día no Sanatorio da Lanzada; pero esta resignación non é para todo o mundo, xa que hai unha  serie de persoas que si atopan respaldo dende o Concello e nalgunha ocasión á costa dos fondos municipais.

CASUALIDADES E CURIOSIDADES

Semanas atrás estívose a informar na prensa que a filla do Alcalde, Alma María Pérez Aguiño, esta nunha situación privilexiada para optar a un posto dentro da Deputación de Pontevedra no que so superaron a primeira proba da oposición provincial de Administrativo C1 tres persoas, entre elas a nomeada e cunha nota que supera en 5 puntos ao segundo de tres clasificados. Non dubidamos da cualificación de esta persoa para obter esta praza pero é que ultimamente estanse a dar moitas casualidades de persoas vinculadas ao Partido Popular de O Grove que atopan rédito laboral na Administración local ou provincial. Que a amiga persoal da Concelleira de “Benestar”, Mónica Novas Dios, que leva a cabo varias actividades para o Concello que non pasaron por ningún tipo de concurso público, o posto no Gabinete de Comunicación do Concello de Ribadumia, da Concelleira de Educación, Laura Besada, o traballo nun organismo dependente da Xunta do Concelleiro de Facenda, Juan Callón, ou o troco de persoal, nada máis chegar ao poder o PP, da persoa encargada de preparar a comida @s miniñ@s na Gardería Municipal, traballo que desempeña unha familiar directa do Alcalde, non son máis que algunha das casualidades que se dan nestes tempos, no que o mercado de traballo está moi limitado.

Outro caso curioso, é o do xenro do Alcalde. Á nosa formación cónstalle ao menos dúas dema

ndas laborais ao Concello na que a súa defensa foi encomendada a un tal, Alberto Gallego Rivera, avogado con bufete en Vilagarcía de Arousa, sobriño de Rivera Mallo, senador polo PP e ex-alcalde de Vilagarcía de Arousa. Curiosamente, este avogado, Gallego Rivera comparte despacho profesional cunha persoa que Miguel Ángel Pérez coñece moi ben: o marido da súa filla, Martin Serante Álvarez, ex-responsable do Gabinete de Rafael Louzán que compaxina a súa profesión de avogado coa de Concelleiro no Concello de Ribadumia. Ademais, e seguindo coas curiosidades, ningunha das especialidades xudiciais que ambos letrados publicitan (Civil, Penal, Familia, Mercantil, Tributario e Sucesións) concordan có obxecto das demandas no que o Concello de O Grove está inmerso.

Por se fora pouco, nos recentemente aprobados orzamentos do Concello de Ogrobe para o ano 2014, atopamos unha partida de 80.000€ que se adicarán a sufragar os gastos xurídicos dos nosos representantes. Coñecida é a polémica que este tipo de gastos está a causar entre a cidadanía, que ve como un dos socios de goberno do PP protagoniza escandalosas actuacións que despois rematan nos xulgados e, semella, temos que pagar entre todos.

A Asemblea de Anova – Irmandade Nacionalista en Ogrobe considera que estas casualidades e curiosidades, deben ser explicadas de maneira inmediata, polo Alcalde do Grove, xa que son “sospeitosas” de enchufismo e non concordan coa filosofía de “transparencia”, “austeridade” e “honradez” que promulgan a voces sobre a súa xestión.

As persoas que militamos ou simpatizamos con Anova Ogrobe, somos cidadáns que participamos na política, por considerar que “existe outra maneira de facer as cousas”, polo que nos vemos na obriga non só de propoñer actuacións que consideramos mellorarían a calidade de vida dos nosos veciños e veciñas, senón tamén a denuncia de todos os actos que nos parezan propios de réximes pasados como o caciquismo, o despotismo ou o  autoritarismo, moi lonxe da democracia participativa que defendemos.

Seguiremos informando...

Xose Manuel Domínguez.
Responsable institucional Anova – Irmandade Nacionalista en Ogrobe.

XA É NADAL NO CONCELLO DE OGROBE!

MÁIS MULTAS E MENOS INVERSIÓNS SON O REGALO QUE O TRIPARTITO LLE TEN PREPARADO Ó POBO DE OGROBE.

Nestas datas, moitos galegos e galegas collerán o seu coche e encamiñaranse a diversos lugares para xuntarse co resto da familia e gozar dunhas felices festas. Recomendámoslles que teñan coidado nas estradas, pois é sabido que en tempos de crise, o Estado e o Goberno do Partido Popular están pendentes dos límites de velocidade para que os ingresos públicos non se resintan tanto.

No Concello de Ogrobe teñen a mesma ideoloxía. Pretenden recadar uns 120.000€ durante todo o ano só en multas de tráfico. En vez de favorecer unha maior actividade económica para que reverta nuns maiores ingresos por impostos progresivos que graven máis ós que máis teñen, ou ideando sistemas de aforro e eficiencia económica no seo da administración local, o goberno de Miguel Ángel Pérez, co concelleiro de facenda como cómplice, pretenden fritir a multas ós veciños e veciñas de Ogrobe.

Por se fose pouco, o pintoresco e egocéntrico Fredy Bea, como concelleiro de seguridade cidadá, plantexou a idea de instalar uns semáforos con radar mediante concesión a unha empresa privada que levará parte da recadación. Esta privatización que so persigue unha maior recadación, terá un custe aproximado de 100.000€, é dicir, “lo comido por lo servido”. Agardamos que, cando menos, non existan vínculos entre o goberno local e a empresa concesionaria.

No entanto, os gastos en inversión, os que realmente terían unha repercusión positiva no conxunto da cidadanía son os máis reducidos das dúas últimas lexislaturas, sufrindo un descenso do 33% respecto do ano 2013 e do 99% respecto a 2009. Situando ó Concello de Ogrobe nunha posición de inoperatividade que se debe ó uso do mesmo para o beneficio propio dos integrantes do goberno local e dos seus intereses como individuos e como grupo.

Dende a asemblea local de Anova – Irmandade Nacionalista en Ogrobe non podemos máis que posicionarnos totalmente en contra destes proxectos e ideas que en tempos de crise non fan máis que restar capacidade económica ás familias e veciños que xa están a sufrir dun xeito terrible as consecuencias dun sistema capitalista devorador e despiadado.

Xosé Manuel Domínguez.
Responsable institucional Anova – Irmandade Nacionalista en Ogrobe.

Ricardo Garrido.
Coordinador local Anova – Irmandade Nacionalista en Ogrobe.

O AUMENTO DO CANON DE SOGAMA É UN PASO MÁIS NO ROUBO QUE O PP PRACTICA CO POBO: PÉREZ E CALLÓN CÓMPLICES DO DESPROPÓSITO

 UNHA POLÍTICA INEFICIENTE E CACIQUIL EN MEDIO DA CRISE FAI QUE SOGAMA LLE CUSTE MÁIS DO NECESARIO Á CIDADANÍA.

A Lei 10/1997, de 22 de agosto, de residuos sólidos urbanos da Galiza, e o Plano de xestión dos residuos sólidos urbanos da Galiza atribúen a condición de xestor nas operacións do proceso de xestión de residuos á Sociedade Galega de Medio Ambiente S.A. (SOGAMA). A Xunta, gobernada polo PP, incrementou nos orzamentos un 34% o canon do lixo, o que repercute nun aumento do canon para o noso concello de 35.000€, un aumento próximo ó 12%, mentres a cifra total de orzamentos descende nuns 12.000€.

Esta decisión vén imposta polo cambio na tarificación eléctrica do goberno central. SOGAMA con este incremento nos impostos da cidadanía pretende consolidar á conta do pobo preto de 7 millóns de euros de beneficio. Á vista do novo saqueo ao que se está a someter á cidadanía desde as institucións central e autonómica, e mesmo pretender que a xente do común pague as consecuencias dunha política medioambiental nefasta e feita para os “amiguetes” do PP, apostamos por modelos que prioricen a reciclaxe e compostaxe e crear emprego directo na zona.

Dende a institución municipal, hai que pular por tratamentos ecolóxicos (recollida selectiva de calidade, reciclaxe, compostaxe) e corrixir a recollida sen separar, así como o vertido e a incineración. Con accións neste sentido debemos pular por reverter os custos de tratamento na propia localidade con creación de emprego específico e conxelar o incremento das taxas nun momento económico tan desfavorable para a poboación. Mentres tanto, aumentar os pagos a SOGAMA é financiar a ineficiencia ambiental e a destrución de recursos e empregos.

Ademais, o concelleiro Callón, titular de facenda, así como o Alcalde, comunicaron que a desaparición de dous postos de traballo temporal no plantel do Concello debíanse á suba do canon de SOGAMA. Recentemente, este canon ven de ser suspendido,  mentres que os dous postos de traballo seguen amortizados. Hai que facer ver que a verdadeira motivación e causa desta amortización é o aumento do soldo da concelleira Ayda Filgueira ó pasar de ter unha adicación parcial a outra exclusiva. É de sobra coñecida o conflito que este tipo de situacións entre o Alcalde e os seus dous pintorescos socios de goberno xeran entre Callón e Pérez. Dende Anova – Irmandade Nacionalista en Ogrobe preguntámonos si o goberno municipal está na Casa do Concello para gobernar e favorecer o benestar do pobo ou para chupar da teta do contribuínte, desangrando a facenda municipal en beneficio propio. Unha boa mostra é a privatización do Punto Limpo impulsada por Fredy Bea e que lle custará ó pobo de Ogrobe un mínimo de 145.000€, que cobrará a empresa concesionaria do servizo.

 Deste xeito, solicitamos ó goberno tripartito que se sume á iniciativa feita por Alternativa Galega de Esquerda no Parlamento de Galicia referente á crítica ó sistema de SOGAMA e á proposta de alternativas para que a cidadanía non pague por débedas que ela non xerou. Así, instamos á Xunta de Galiza a derrogar o Plan de Xestión de Residuos Urbanos de Galiza 2010-2020 e crear un modelo de xestión local de reciclaxe e compostaxe, para impulsar a creación de emprego.

Ricardo Garrido Caneda.
Coordinador local de Anova – Irmandade Nacionalista en Ogrobe.

Xose Manuel Domínguez.
Responsable Intitucional de Anova – Irmandade Nacionalista en Ogrobe.

http://www.parlamentodegalicia.es/axenda/MostrarRexistro.aspx?numrex=0195876P