O 8 de marzo conmemorase o Día Internacional das Mulleres e dende a
Asemblea Local de Anova –Irmandade Nacionalista de Ogrobe queremos aproveitar
para manifestar a necesidade de seguir traballando pola igualdade de
oportunidades e de dereitos entre homes e mulleres.
A crise que estamos
a vivir provocada pola estafa financeira págase con recortes aos máis débiles,
e seguimos sendo as mulleres un dos colectivos máis afectados. Somos maioría como usuarias dos servizos públicos,
maioría tamén nas tarefas de coidado aos
demais, e maioría dentro dos
empregados públicos, polo tanto, son mais mulleres as que están indo ao
paro cós recortes en educación, sanidade e servizos sociais.
Por outro lado as
mulleres seguimos sufrindo unha situación de desigualdade económica e laboral difícil de soportar, maior taxa de
desemprego e precariedade, e segundo a derradeira enquisa salarial, en Galicia,
as galegas cobramos un 22% menos que os galegos no mesmo posto de traballo.
En canto ao noso
pobo, tendo en conta a paralización económica e o desemprego galopante, a
situación non é mellor. O Grove cerrou febreiro con 811 mulleres en situación de desemprego fronte aos 688 dos homes na
mesma situación.
A actual Lei de
Bases de Réxime Local, no seu artigo 28, permite á maioría de concellos ter
concellerías, actividades e plans de promoción da igualdade, potestade que non
se está a exercer no noso pobo pola Concellería de Igualdade do Concello do
Grove que non destaca por ser precisamente durante este últimos dous anos unha
ferramenta para a emancipación das mulleres, a denuncia constante da
discriminación e a loita pola igualdade de xénero.
No noso pobo
contamos cunha Concellería de Igualdade
inútil e incapaz, na que as últimas novas sobre ela refírense a perda de subvencións e a contratación
dunha “axente de igualdade” que fai as funcións de asesora persoal dunha
Concelleira que lle costa ás arcas municipais máis de 14.500€ (sen contar as
retribucións a Seguridade Social e o soldo do seu persoal particular). Emprazamos
á Concelleira de Igualdade e Servizos Sociais a que empece a traballar despois
de dous anos de vacacións retribuídas a costa de todos nos. Proba da súa
ineptitude e a non renovación do Plan de
Igualdade do Concello do Grove (ferramenta institucional fundamental para
poñer en marcha políticas municipais de igualdade de maneira transversal), da
cal a súa primeira versión (o I Plan de Igualdade) expirou o pasado ano. Ademais
este Concello contaba cun activo Consello
Local de Igualdade na anterior corporación, inoperativo dende fai dous anos.
Segundo a páxina web do Concello o CLI leva dende o verán de 2012 “a facer unha
revisión do regulamento para axustalo ás necesidades do momento”.
É un bo momento
para empezar a aplicar medidas destinadas á transformación real da nosa
sociedade, onde as mulleres sexan cidadás en plenitude de dereitos, pero tamén
é un bo momento para visualizar a impunidade cós que os gobernos do Partido Popular
“desmantelan” os logros recibidos.
A Asemblea Local de
Anova Ogrobe solicítalle ao Goberno municipal:
1. 1. Que manifesten o seu máis firme rexeitamento
ás políticas de recortes levadas a cabo polos gobernos central e autonómico en
materia de educación, sanidade, servizos sociais e cultura que están a
afectar de maneira especial ás mulleres, así como as últimas declaracións de
ministros e altos cargos do estado que atentan contra a igualdade e a liberdade
das persoas.
2. 2. Que manifesten a súa rotunda oposición
a calquera proposta de supresión das políticas municipais de igualdade que
signifiquen a eliminación e redución de competencias recollida no anteproxecto de reforma da Lei de Bases de
Réxime Local presentada o pasado venres 15 de febreiro polo PP en Consello
de Ministros
3. 3. Que poñan en marcha medidas encamiñadas a impulsar a Concellería de
Igualdade con iniciativas claramente favoreceras de políticas de igualdade:
dotar de recursos para favorecer a conciliación
persoal e laboral (ludotecas, centro de día...), coeducación en Igualdade, obradoiros de igualdade para a comunidade
escolar, favorecer o asociacionismo
entre mulleres, publicación dunha guía
de recursos sociais, promoción de
igualdade no mercado laboral, potenciar a formación para o emprego e o emprendemento feminino...
4. 4. Que Impulsen o Consello Local de
Igualdade como órgano de participación cidadá que teña como función
perfilar accións de fomentación de valores igualitarios e anti-discriminatorios
e de sensibilización social preventivas de violencia de xénero.
5. 5. Que se poña en contacto coa empresa
Garavilla, e faga as xestións necesarias para garantir os posto de traballo
nun sector, o conserveiro, que emprega fundamentalmente a mulleres.
6. 6. Que, coñecedores dos recursos que ofrecen as distintas administracións,
fagan uso de elas, e así sexa do
Plan cultural da Deputación ou da Rede de Auditorios e Teatros de Galicia (ao
que Ogrobe podería estar adscrita), faciliten actividades culturais orientadas
a promover a igualdade.
A Asemblea Anova Ogrobe considera que nun acto
de responsabilidade o rexedor municipal debería poñer ao fronte dunha
Concellería de carácter transversal como é a de Igualdade, a unha persoa con máis interese e dedicación en
xestionar políticas de igualdade que a actual responsable da área.