AGE esixe que as escolas infantís pasen a ser “un servizo público, universal e gratuíto”

Alternativa Galega de Esquerda (AGE), a través do seu deputado Juan Fajardo, esixiu onte no pleno do Parlamento de Galicia que a Xunta inicie “os trámites necesarios para converter as escolas infantís nun servizo público universal e gratuíto”. Entrementres estes trámites non comezan, engadiu, “é imprescindíbel deixar sen efecto o artigo un do decreto 49/2012 e, así, conxelar os prezos para as familias das garderías”. Alternativa aceptou as emendas dos outros grupos da oposición –BNG e PSdeG- mais topou coa negativa do Partido Popular, sempre ao servizo dos ricos e das clases altas ás que tan ben representan. Para o PP de Feijóo, a igualdade de oportunidades e os servizos públicos básicos son o inimigo.

“Os salarios decrecen en Galicia por riba da media do Estado español e de Europa”, sinalou Fajardo, “e o desemprego e as persoas que non reciben xa prestación atinxen cifras insoportábeis. Neste contexto, a autodenominada Consellaría de Benestar aproba unha resolución o sete de agosto para aumentar os prezos das escolas infantís un 2,2%”. Coa decisión do departamento de Beatriz Mato, tomada coa habitual aleivosía estival deste Goberno, unha familia no limiar da pobreza deberá pagar 93 euros ao mes. “Este incremento é absolutamente inaceptábel, máis na situación actual das familias galegas”, explicou Juan Fajardo, quen lembrou que esa suba contradí o propagandístico plan de dinamización demográfica da propia Xunta.

O PP comprométese con AGE a reparar a cuberta do pavillón do CEIP Rosalía de Castro de O Grove cun investimento de 40.000 euros

·        O deputado Ramón Vázquez presentou unha iniciativa en comisión na que se instaba á Xunta de Galicia a asumir os seus compromisos e levar a cabo as urxentes obras de acondicionamento no centro

Santiago de Compostela, 23 de outubro de 2013.- Alternativa Galega de Esquerda levou a comisión parlamentar unha iniciativa na que se esixía á Xunta de Galicia a realización das obras de mantemento e acondicionamento que precisa de xeito urxente o CEIP Rosalía de Castro de O Grove e que lembran foron comprometidas por parte da Consellería de Educación cos responsables do centro que como tantas outras promesas do goberno galego están sen cumprir. O Partido Popular pese a non apoiar co seu voto esta iniciativa alegando que era algo que xa estaba previsto facer, comprometéronse en sede parlamentar a reparar a cuberta do pavillón do centro unha das principais reivindicacións da comunidade educativa xa que o estado actual do mesmo impide o seu uso nos días de choiva.

O deputado de AGE, Ramón Vázquez, sinalou na súa intervención a necesidade de que o goberno galego cumpra coas súas promesas e obrigas e realice canto antes as obras de reparación dos baños do colexio xa orzamentadas pero aínda sen executar entre as que se suman outras actuacións como o arranxo da fachada do edificio ou a colocación dos elementos precisos para a adaptación do centro educativo á normativa de seguridade e prevención de riscos actual.

Ante o compromiso formulado por parte do PP na comisión de Educación, o deputado de AGE, Ramón Vázquez, manifestou a súa intención de vixiar que o Partido Popular, desta volta, si cumpra as súas promesas e acometa as obras comprometidas.   

Parque infantil do CEIP Rosalía de Castro 

VIDEO: AGE leva ao Parlamento as deficiencias do CEIP Rosalía de Castro

Os parlamentarios de AGE, Ramón Vázquez e Xavier Ron, defenderon esta tarde na Comisión parlamentar de Educación e Cultura unha proposición non de lei na que esixía á Xunta de Galicia que cumpra cós compromisos adquiridos no 2010 para solventar as dedeficiencias que sufre o CEIP Rosalía de Castro en Ogrobe. Vázquez recordoulle aos membros da Comisión que ese compromiso consistía nunha reforma integral do centro que se levaría a cabo en 3 fases: unha primeira fase de reparación do tellado e da fachada do centro; unha segunda fase de adecentemento de aseos, corredores e aulas; e unha terceira fase de reparación do pavillón. Ata o de agora só se levou a cabo de maneira efectiva a primeira das fases no verán de 2011, ano no que por certo se celebraron as elección municipais e estatais.

A segunda fase, que se levaría a cabo no verán de 2012, quedou inconclusa, prometendo a Consellería de Educación para este ano 2013 e cun orzamento de 120.000€, o arranxo dos aseos da primeira planta e o cambio de dous ventanais, obras que como recordou o parlamentar de AGE aínda non se levaron a cabo.

A terceira fase que consistiría no amaño da cuberta do pavillón, prevista inicialmente para o verán de 2013 foi calificada por Ramón Vázquez de “imprescindible e urxente”, por implicar unhas “nefastas condicións educativas ao impedir o normal funcionamento das actividades de docencia que se poidan realizar e os tempos de recreo nos días de choiva”.

Ademais, o parlamentar de Alternativa Galega de Esquerda, informou de outras intervencións urxentes como o adecentemento do patio interior, a instalación de porterías e canastas, colocación de elementos de seguridade en esquinas e zonas de xogo e a adaptación á normativa de seguridade e prevención de accidentes do patio infantil dos nenos e nenas de 3 a 6 anos.

Tamén se fixo eco da demanda da ANPA do Colexio Rosalía de Castro da xuntanza que leva reclamando aos responsables da Consellería de Educación dende fai tempo e do que non obtén resposta.

Tanto o Bloque Nacionalista Galego como Partido Socialista de Galicia manifestaron o apoio a dita proposición non de lei, non así o membro do Partido Popular, Rodríguez González, que despois de afirmar a especial sensibilidade da Consellería de Educación e da Xefatura Provincial ás demandas do centro meco anunciou no seo da comisión a “posta en marcha” e de maneira “inmediata” dunhas obras na cuberta e fiestras do pavillón por algo máis de 40.000€. Rodríguez afirmou que estas obras estaban planificadas dende fai tempo, cando o alcalde defendeu fai pouco nos medios de comunicación e nas xuntanzas mantidas a petición da ANPA e na que Anova Ogrobe estaba presente, que o arranxo do pavillón non era unha acción prioritaria nos tempos de crise económica na que nos atopamos. Nada expresou o representante na comisión do grupo popular sobre as outras demandas contidas na proposición de Alternativa Galega.

AGE insiste en que a Xunta realice as obras no CEIP Rosalía de Castro

AGE esixe á Xunta que cumpra as súas promesas co CEIP Rosalía de Castro de Ogrobe e leve a cabo as urxentes obras que precisa o centro

Alternativa Galega de Esquerda presentará mañá en comisión parlamentar unha iniciativa na que esixe á Xunta de Galicia a realización das obras de mantemento e acondicionamento que precisa de xeito urxente o CEIP Rosalía de Castro de Ogrobe e que lembran foron comprometidas por parte da Consellería de Educación cos responsables do centro que como tantas outras promesas do goberno galego están sen cumprir. 

 

O deputado de AGE, Ramón Vázquez, trasladará aos membros da comisión a necesidade de instar á Xunta a cumprir coas súas promesas e obrigas e cometer canto antes as obras de reparación dos baños do colexio xa orzamentadas pero aínda sen executar, e rematar outras obras tamén comprometidas como a reparación da cuberta do pavillón, o arranxo da fachada do edificio ou a colocación dos elementos precisos para a adaptación do centro educativo á normativa de seguridade e prevención de riscos actual.

Yolanda Díaz denuncia que os recortes de Núñez significan “dramas, desafiuzamentos, paro, fame e miseria”

A viceportavoz de Alternativa Galega de Esquerda acusa ao PP de practicar “políticas criminais”, desmonta os números embusteiros da Xunta e expón as iniciativas do seu grupo parlamentario 

Santiago de Compostela, 17 de outubro de 2013.- Yolanda Díaz, viceportavoz de Alternativa Galega de Esquerda (AGE), dedicou a súa intervención esta mañá no debate de estado da nación a desmontar cifra a cifra a enorme colección de mentiras do señor Núñez. “É vostede o presidente que máis recortou o orzamento na historia de Galiza”, afirmou Díaz, “pero falar de recortes é falar de dramas, de desafiuzamentos, paro, fame e miseria. Vostede o único que sabe facer é maquillar os números”. A débeda pública triplicouse dende 2009 –cando Núñez asumiu a presidencia-, o paro dobrouse e a pobreza atinxe –segundo datos de Cáritas- a 650.000 cidadáns galegos.

A viceportavoz de Alternativa acusou ao PP comandado por Núñez de “practicar políticas criminais e mentir, a continuación, nas cifras”. “Un de cada tres parados xa non cobran prestación”, expuxo Días, “e vostedes xa nin sequera practican a caridade, non son a dereita da caridade, son a dereita da fame”. Co pano de fondo da variación do 12,9% de desempregados rexistrados en 2009 ao 22,6 no ano en curso -278.000 galegas e galegos -segundo a Enquisa de Poboación Activa-, as accións da dereita encarnada polo Partido Popular cóntanse por ataques furibundos contra as maiorías sociais e as traballadoras e traballadores deste país. “Retire o decreto dos comedores e dedique cartos ao ensino público”, clamou Díaz, “e supriman paseniñamente, fíxese que digo paseniñamente, os concertos con colexios privados”. AGE presentou resolucións ao respecto de todas estas cuestións, sistematicamente rexeitadas polos conservadores.

Propostas de resolución de AGE para o debate do estado da nación

Alternativa Galega de Esquerda expón nas resolucións do debate do estado da nación a súa alternativa as políticas agresoras do PP.

Alternativa Galega de Esquerda (AGE) rexistrou esta mañá ás súas propostas de resolución no debate do estado da nación. Nelas, o grupo parlamentar vertebra a súa alternativa ao Goberno do Partido Popular e ás súas políticas austericidas e agresoras coa cidadanía do común. As propostas céntranse nos problemas reais dos cidadáns e atópanse lonxe das accións de maquillaxe e das medidas publicistas anunciadas polo señor Núñez no seu discurso de onte. O voceiro de AGE, Xosé Manuel Beiras, e a vicevoceira, Yolanda Díaz, acompañados polos deputados do grupo parlamentar, salientaron en rolda de prensa que as propostas de Alternativa recollen medidas orientadas a resolver os problemas da cidadanía e a rematar coas agresións da Xunta. 

Yolanda Díaz encargouse de presentar as liñas fundamentais nas que se centran as propostas. Entre outras, a suspensión da taxa anunciada pola Xunta para os hidrocarburos -o chamado céntimo sanitario-, xa se tratase dunha “indecencia gravar a cidadanía con impostos indirectos”. Ou evitar a liquidación final do sistema financeiro galego, que se pretende consumar coa venda de Novagaliciabanco. AGE esixe a paralización desta operación e a construción dunha banca pública a partir do mesmo. Tamén se inclúe unha serie de iniciativas en defensa dos distintos sectores industriais, con especial referencia ao naval para o que Alternativa esixe o prometido dique flotante e carga de traballo urxente. Díaz destacou que é preciso mudar de xeito radical a política económica do noso país e deixar de encher o territorio de polígonos industriais, moitos deles baleiros. Nese senso, AGE tamén defende un cambio na política de protección do patrimonio ambiental que evite a ocupación de solo rural e protexido por novos polígonos industriais. O grupo solicita, ademais, unha auditoría da débeda pública para que se explique en que se investiu e así saber a que servizos públicos foron parar os da débeda actual.

Alternativa propón a creación dunha renda básica universal contra o drama que están a padecer milleiros de familias por debaixo do limiar da pobreza. A mudanza do modelo de relacións laborais ou a elaboración dun plan estratéxico de emprego que abranga todos os sectores e inclúan apostas novas como o emprego verde é outra das propostas de resolución rexistrada. No plano medioambiental, AGE presentou diversas iniciativas nas que se pide, por caso, pular por un sistema de incineración de residuos distinto ao de Sogama; avanzar na redución das emisións das centrais térmicas de Meirama e As Pontes; loitar por unha Galiza libre de fracking; apostar por outro ferrocarril más aló do da alta velocidade ou acabar coa estafa das grandes eléctricas no noso país. 

"A cidadanía sempre remata por derribar aos tiranos". Beiras no debate do estado da nación

Xosé Manuel Beiras debuxou esta tarde o estado dunha nación, a galega, na que “cada vez hai máis cidadáns en condicións límite de existencia”. Nunha intervención de corenta minutos, o portavoz de Alternativa Galega de Esquerda (AGE) repasou polo miúdo as desfeitas en que a reacción, encarnada en Galicia no PP do señor Núñez, deitou a Galiza e acabou chamando á cidadanía á “reconquista das liberdades cívicas e políticas efectivas porque é a hora da soberanía popular no sentido propio da palabra”.

Perante a colección de embustes emitida esta mañá polo presidente da Xunta, que deixou a imaxe dun país inexistente e –segundo el- a piques de saír da crise, Beiras descendeu á terra. “Existen médicos e sanitarios que cualifican de ‘homicida’ a decisión de que os pacientes de enfermidades crónicas ou graves teñan que pagar polo tratamento extra hospitalario”, exemplificou, “medra a mortalidade dos vellos que non se medican polo repago, empurraron a clase labrega ao exterminio, efectúan un ataque racista e clasista contra o noso idioma”. “Carecen vostedes de sensibilidade?, son vostedes de pau?”, espetou Beiras ás bancadas do PP. Mentres, o señor Núñez comentaba entre risos as palabras do portavoz de AGE.

Beiras censura que Feijóo use as vítimas do accidente de Angrois para adobiar un discurso a anos luz da vida da xente

"Hai que ter o estómago de caucho para utilizar as vítimas, os veciños de Angrois, os maltratados traballadores da función pública ou aos voluntarios para parasitar unha traxedia da que eles mesmos foron responsábeis". Para Xosé Manuel Beiras o discurso de Alberto Núñez Feijóo no debate de estado da nación caracterizouse, sobre todo, por "quedar descualificado no ámbito da ética máis elemental".

"Os seus colegas, que ocupan altísimo cargos, foron directamente responsábeis do que sucedeu en Angrois", engadiu, " e cuñados de 'terroristas' non polo Beiras, senón por unha deputada do PP que ía no tren". O señor Núñez apelou, coa habitual falta de escrúpulos que amosa, a un presunto "espírito de Angrois" para intentar desactivar o traballo da oposición.

Logo de case dúas horas dunha intervención baseada na mentira e no cinismo, o único que quedou claro é que Núñez vive nunha realidade paralela. Ou que di que vive nunha realidade paralela. "Se prestastes atención", dirixiuse Beiras aos medios de comunicación ao remate do discurso do presidente da Xunta, "un pensaría que estabamos diante dunha persoa que estaba a facer o seu discurso de investidura. Pois ben, se quere facelo, que convoque eleccións".

Segundo Núñez, no seu discurso triunfalista e alienado, a anos luz da vida da xente, Galiza "achégase á saída da crise". Ese país que non existe e esa noxenta apoloxía das políticas de austeridade que levan Europa ao abismo social e económico serán contestadas por Alternativa Galega de Esquerda. E xa o están a ser nas rúas, nas fábricas, nos centros de traballo, nos movementos sociais, nos sindicatos, en todos os segmentos da cidadanía non resignada que esta mañá, ao escoitar a Núñez, só puideron sentir unha profunda náusea.

Ás 16 h comeza a quenda dos grupos da oposición no #debate2013, falará Xosé Manuel Beiras sobre as cinco menos vinte, que o podes ver en directo no seguinte enlace. Deixamovos a varloración do dedebate do Estado da Autonomia feita por Xosé Manuel Beiras

Ata sempre Xoan Fuentes!

Escribir algo dunha persoa amiga ca que pasastes moitas  horas falando do humano e do non humano non é difícil.

Coñecín a Xoán fai uns 20 anos, cando ía como candidato, no posto nº 3, polo BNG, nas eleccións municipais. Nos dous primeiros postos ían Luis Rei e Manolo Mascato. Foi no antigo Cine Marino onde pronunciou unha conferencia maxistral, non un mitín (a él non lle ían os mitines).

Finalizado o acto conversamos, tomando un viño, sería o primeiro de moitos outros, para él mellor tinto.

É un home, dígoo en presente e non en pasado, pois sigue vivo, mentras siga o seu recordo en tod@s nós, tremendamente metódico. O seu raciocinio parécese máis á  escola do norte de Europa, en especial á alemana,  que á do sur. De aí a súa dedicación a pasar ao galego obras e ensaios de filosofía e lingüístas, tamén poesía, destes países e ao revés.

Lector, traductor tamén dos clásicos gregos e latinos, as horas con Xoán non remataban nunca, pois continuaban  na próxima. Nas súas conversas precisaba ata ao máximo cada palabra para acadar o senso da conversa.

Con todo esto, non é de estranar que xurdira en el o sentimento nacionalista. Pois os coñecementos, ou se comparten coa sociedade na que vivimos, ou non serven para nada.  Nacionalista aberto, con conexión coa xente ca  que convive, participando no coro Boca da Ría de S. Vicente, Festa da Malla, das que disfrutaba cos veciños e veciñas.

Podíanse decir moitas máis cousas, pero non é este o momento nin o lugar. Só transmitir dende ANOVA I.N. a soliradidade coa familia, en especial con Dolores, a súa compañeira inseparable.

As  súas cinzas serán espalladas na Boca da Ría -entre Ons e Sálvora-.Todo un símbolo.

ABUR AMIGO¡¡¡

Xose Manuel Domínguez.

Responsable institucional de Anova - Irmanandade Nacionalista en Ogrobe.

A Xunta será cómplice dunha medida noxenta, cruel e clasista como é o repago farmaceútico en hospitais

Alternativa Galega de Esquerda manifestou o seu total rexeitamento ao repago da farmacia hospitalaria que o Goberno estatal anunciou xa que introduciría antes de final deste mesmo ano xa que se trata dunha medida noxenta, inhumana, cruel e clasista e que responde ao capitalismo máis salvaxe impulsado polo Partido Popular. Así, a deputada de AGE, Eva Solla, asegurou que “a señora Mato e o Goberno do PP teñen pensado deixar morrer á xente” en base a un falaz aforro económico que no chegará ao 0,1 por cento.

A deputada de AGE lembrou que non se trata de calquera enfermo ou enferma senón que son os máis graves, como cancros graves de próstata, de ril, de mama, leucemias, tumores cerebrais, artrite reumatoidea, hepatite C, citomegalovirus afectando así aos enfermos graves de SIDA, esclerose múltiple, e moitas máis.

Un repago do 10 por cento o que suporá pagar ata 4,20 euros por envase. Unha barbaridade coa que se converte un dereito social básico nun negocio e nun privilexio castigando unha vez máis aos mais desfavorecidos do noso país, algo que ao PP semella non lle preocupar o máis mínimo e que se ven a sumar aos recortes nas pensións, ao drama do paro, o repago nos comedores escolares, e unha longa lista de medidas contra a cidadanía do común coas que este “Goberno socializa as perdas para que paguemos entre todos e todas e privatiza os beneficios para que os cobren uns poucos”.

A deputada Eva Solla defendeu na súa intervención na Comisión de Sanidade o noxento que resulta o feito de que a mesma ministra Mato inmersa na trama Gürtel que lle financiaba con cartos públicos a súa vida privada, as súas festas ou as súas vacacións, sexa a que anuncie que lle van recortar aos que peor están, aos enfermos graves ou graves crónicos. “´É a corrupción da democracia, a podremia do réxime” lamentou.

Por todo isto, Alternativa Galega de Esquerda esixe ao goberno galego que amose a súa oposición a este un atentado contra a saúde dos máis febles da que a Xunta de Galicia será cómplice por apoiar esta medida que provocará a morte de xente no noso país, “pero ao Partido Popular lle da o mesmo”.

A Lei de inclusión social do PP repartirá é miseria e desesperanza

Alternativa Galega de Esquerda asegura que a Lei de inclusión para Galicia que pretende aprobar o Partido Popular é a lei da desesperanza e a miseria coa que a o goberno galego deixará morrer a milleiros de persoas que están xa por  debaixo do limiar da pobreza.

O deputado de AGE, Juan Manuel Fajardo, denunciou hoxe en rolda de prensa a falla de humanidade amosada unha vez máis polos populares xa que semella “para optar a un cargo dentro do PP, é preciso deixar o alma na casa”. Esta é a única explicación para xustificar algunha das condicións recollidas nesta Lei que na súa memoria económica contempla unha achega de 0,21 céntimos diarios para as máis de 650.000 persoas que actualmente están por debaixo do limiar da pobreza en Galicia. “Habería que castigar aos responsables políticos deste tipo de decisións a vivir durante medio ano como están a obrigar a vivir a estas persoas a ver se despois seguían defendendo as mesmas teorías” explicou o deputado Juan Manuel Fajardo e engadiu que “haberá que eliminar os coches oficiais e os ambientadores que colgan dos retrovisores dos mesmos porque se ve que este espazo rela o cerebro dos nosos gobernantes que viven alleos a dramática realidade de milleiros de persoas no noso país”.

Involución educativa

Hoxe Xoves día 10, o Congreso do Estado español dará estocada ao sistema educativo que ata agora todos coñecemos, coa nova reforma do sistema educativo. Esta pasará practicamente intacta ao Senado que a devolverá de novo ao Congreso para a súa final aprobación a finais de ano.

A maioría absoluta do partido Partido Popular fixo que a reforma puidese sortear facilmente as emendas á totalidade así como a maioría das modificacións presentadas pola oposición. Incluíndo 42 modificacións do Partido Popular e só 36 da oposición, a maior parte delas do partido UPyD.

A LOMCE ou Lei Wert pasa a ser un ataque sistemático e frontal ao actual sistema educativo, público, universal, de calidade e gratuíto retrotraéndonos décadas atrás nos dereitos dos estudantes e da cidadanía en xeral.

Puntos polémicos como o impulso da Relixión Católica, infamia do adoutrinamento máis reaccionario, probas de acceso universitarias convocadas polas propias universidades e suba de taxas, establecendo así unha elitización do ensino, ou centralización dos contidos fan que a involución se torne realidade.

Deste modo a nova lei educativa supón o desmantelamento continuo do ensino de calidade, levándoo cara un proceso de mercantilización continuo e eliminando todo resquicio de democracia organizativa caracterizada polos Consellos escolares, fincando como mero órgano consultivo e transferindo as súas competencias á Dirección.

Por outra banda, ataques directos aos idiomas cooficiais do estado coa mención expresa do idioma castelán como lingua vehicular, non é máis que a posta por escrito das súas masturbacións intelectuais e as súas ansias de colonización das distintas Nacións sen estado que aínda conseguen manter un idioma propio. Todo isto coa éngadega da redución da carga lectiva no noso propio idioma, o galego, levándonos unha vez máis a un ataque de españolización continua en contra da nosa vontade.

Finalmente e non menos importante é a disposición que ampara as segregacións por sexos, amparándose na convención da UNESCO de 1960, texto que para os nosos estándares de igualdade, a día de hoxe, sería inconstitucional. Un modelo que nos fai volver a tempos de ditaduras fascistas que tanto añoran dirixentes populares, como poden ser os alcaldes de Baralla ou Beade.

Dende Anova queremos reafirmar o noso compromiso co ensino público, universal, de calidade e gratuíto, así como apoiar en todos os eidos as mobilizacións frontais contra esta reforma.

Do mesmo xeito incitar a rebelión da sociedade que dé lugar ao estoupido social que nos leve á creba a cal nos outorgue unha verdadeira democracia e un verdadeiro poder para o pobo.

Paremos a LOMCE! Paremos a expulsión das maiorías sociais do sistema educativo público!

NON PASARÁN!

Tirado da páxina da mocidade de Anova - Irmandade Nacionalista (http://anovamocidade.com/2013/10/10/involucion-educativa/)

Breve crónica da última asamblea comarcal de Anova Salnés

O pasado sábado 5 de Outubro tivo lugar en Cambados unha nova asemblea comarcal de Anova Salnés.

Foi unha asemblea algo atípica, no sentido de que tiñamos un punto, o da fronte ampla, que criamos que necesitaba moito tempo para o debate, polo que reducimos a orde do día, deixando algúns puntos, como a presentación de contas (en Anova Salnés presentamos as contas en cada asemblea, para que haxa total transparencia) para outra asemblea que se celebrara proximamente.

Polo que comezamos, da man dos compañeiros Xurxo, Ricardo e Andrea,  cun resumo da situación e do traballo de Anova na comarca. Expúxose como estaba a situación dos mariñeiros afectados pola regularización, os que damos todo o noso apoio, cales foron os pasos dados dende Anova e dende AGE, e acordamos, como non podía ser doutro xeito, seguir apoiándoos dentro das nosas posibilidades, tanto dende o parlamento como  dándolles respaldo na rúa.

Tamén falamos da situación dos pensionistas que foron emigrantes, e que agora  teñen problemas con facenda. Falamos dos actos realizados, como o de Portonovo, que tivo moi boa acollida, sobre todo polo

formato, cun gran peso no aporte de información, mais aló de criterios políticos. E tivemos oportunidade de felicitar ós compañeiros de Ogrobe, que conseguiron que no pleno municipal se aprobara a apertura dunha oficina de información para os afectados por esta situación, algo que solicitamos noutros concellos da comarca sen resposta positiva. Dende logo estivemos de acordo na necesidade de seguir traballando na mesma liña, buscando aportar solucións antes que gañar rendas políticas.

Logo, da man da deputada Chelo Martinez e do membro da Coordinadora Nacional e da Comisión Permanente como Comisionado de Relacións Políticas,  Luis Eyre Dieguez, abordamos o tempo da formación dunha fronte ampla para acudir as eleccións ó Parlamento Europeo do próximo ano.  Eyre é un dos membros de ANOVA que está a participar nas xuntanzas con outras organizacións políticas ás que se lle presentou a proposta de constitución da Frente Ampla, polo cal a súa visión foinos de gran axuda.

Chelo Martínez e Antón Sánchez denuncian a pasividade de Industria perante as graves irregularidades no plan de inversións de Unión-Fenosa

Antón Sánchez e Consuelo Martínez aseguran de que se non se actúa contra á empresa estarase a incorrer nun delito de prevaricación omisiva.

Consuelo Martínez e Antón Sánchez fixeron público en rolda de prensa as irregularidades detectadas polos propios técnicos e que foron remitidas á consellería. Entre elas, o informe desfavorable ao plan anual e plurianual de investimento para o período 2012-2015 por parte de Unión –Fenosa.

Alternativa Galega de Esquerda denunciou en rolda de prensa o posible delito de prevaricación omisiva no que pode incorrer o director xeral de Industria, Enerxía e Minas, Bernardo Taoces, ao non actuar contra as graves irregularidades cometidas pola empresa Unión-Fenosa Distribución S.A. e que foron xa denunciadas polos técnicos do servizo da Xefatura territorial da Coruña hai máis dun ano.
Consuelo Martínez e Antón Sánchez fixeron público en rolda de prensa as irregularidades detectadas polos propios técnicos e que foron remitidas á consellería entre as que se atopa o informe desfavorable ao plan anual e plurianual

Comunicado perante a explosión no concello de Beade

Dende Anova Salnes queremos suscribir o comunicado realizado por Alternativa Galega de Esquerda perante a explosión dun artefacto no Concello de Beade. Nin tan sequera as mostras de franquismo, autoritarismo, fascismo e desprezo polo ser humano merecen o uso da violencia. Este non é o camiño da revolta cívica que dende Anova - Irmandade Nacionalista propugnamos. 

 Deixamos, a continuación, o texto de AGE: 

 Alternativa Galega de Esquerda manifesta a súa condena a todo tipo de violencia. Alternativa Galega de Esquerda, en relación á explosión rexistrada na Casa Consistorial de Beade (Ourense), quere manifestar o seu rexeitamento ao ataque perpetrado contra a Casa do Concello de Beade. Trátase dun ataque contra a casa do pobo e, xa que logo, dun acto de violencia que ataca á cidadanía, ao conxunto de vecinos e veciñas de Beade. Por todo isto, unha vez máis desde Alternativa Galega de Esquerda insiste en que condena calquera tipo de violencia sen distinción de ningún xénero.

O PP despreza á oposición e pecha en falso a comisión das caixas

Alternativa Galega de Esquerda (AGE), a través do seu deputado Antón Sánchez, denunciou, máis unha vez, “o paripé amañado en que o Partido Popular converteu, dende o inicio, a comisión das caixas”. 

Esta mañá, en sede parlamentaria, a formación do señor Núñez negou toda concesión aos grupos da oposición e impediu, co seu xeito totalitario de entender a vida parlamentaria, pechar en falso o órgano de investigación do proceso que rematou coa aniquilación das vellas caixas de aforros. Non haberá máis comparecencias nin máis documentación, tal e como demandou a oposición. “Parece que a Xunta ten algo que ocultar”, engadiu Sánchez.

Para Alternativa, a comisión debería volver solicitar as comparecencias de Marta Fernández Currás –ex conselleira de Facenda e actual secretaria de Estado-, de Miguel Ángel Fernández Ordóñez –ex gobernador do Banco de España- e de Joaquín Almunia –comisario europeo. Ningún deles se dignou a pasar polo Parlamento de Galicia, malia as súas enormes responsabilidades na liquidación do sistema financeiro galego. O PP non considera relevantes os seus testemuños directos.

Pero é que ademais, na comisión faltou documentación moi relevante. A autorización do Consello da Xunta á fusión de Caixa Galicia e Caixanova non se puxo a disposición dos deputados do Hórreo. “Non sabemos se foi xa para a trituradora de papel ou que pasa”, sinalou o parlamentario de AGE, “pero non foi entregada”. Tampouco houbo explicacións cumpridas sobre o que a Xunta denominou, nun embuste de calado, “auditorías” sobre as entidades encargadas a empresas privadas e que non foron máis ca informes á carta. Literalmente. As misivas coas que o Goberno galego encargou eses informes falsamente chamados “auditorías” non figuran entre a documentación a disposición do Parlamento. Acontece o mesmo co caderno de vendas, que fixa o valor da actual NovaGaliciaBanco e que Alternativa Galega de Esquerda solicitou da Xunta en numerosas ocasións.

 
Así as cousas, AGE non participará na ponencia da comisión das caixas. “Estamos fartos do escurantismo que o PP aplica, nega información e calquera iniciativa da oposición”, conclúe Antón sánchez, “así que non ten sentido participar desta farsa”.

Asemblea comarcal de Anova Salnés pola Fronte Ampla para a ruptura democrática

Este sabado 5 de Outubro teremos no edificio de exposalnes en Cambados, a partires,das 18 horas unha nova asemblea aberta do grupo comarcal de Anova-IN.

Nesta ocasión, ademais de outras temas de interes comarcal e nacional, poremos especial enfase no impulso por parte de Anova dunha fronte ampla coa que concorrer as proximas eleccións europeas, para o cal contaremos coa participación de Luis Eyre, Responsable de Relacións Políticas e membro da CN de Anova, que nos ofrecera información neste senso.

A asemblea insértase no proceso de deliberación e toma de decisión das bases de cara á conformación dunha candidatura electoral. A lóxica coa que funciona Anova - Irmandade nacionalista obriga e permite este exercicio de transparencia e participación co cal queremos volver a ilusionar á xente do común e acerca-la á política, facendo que se involucre nela e expoña as súas ideas, pareceres e inquedanzas. Como sempre, este sera un acto aberto a cidadania, onde calquera de vos pode acudir e dar a súa opinión ou facer propostas.

ORDE DO DÍA
1.- Información e debate sobre a proposta de creación dunha Frente Ampla para concurrir as eleicións europeas.
2.- Información sobre diversas problemáticas de ámbito comarcal e posicionamento e accións dos Grupos locais de ANOVA ao respecto
Tema emigrantes retornados, expedientados por facenda por non declarar as pensións que perciben da emigración.
Tema mariñeiros propietarios de embarcacións menores con problemas para regularizar as súas embarcacións…
Tema Campo de Golf do Grove.
3.- Organización comarcal e das distintas Asambleas locais do Salnés
Revisión da organización comarcal (coordinadora comarcal; responsabilidades; …)
Informe sobre o estado das contas comarcais e da Loteria de Nadal 2013.
Eleición da persoa que se incorporará a Coordinadora Nacional en representación da Área do Salnés
Información sobre os grupos de traballo de áreas específicas que se están a organizar a nivel nacional.
4.- Varios.

ANOVA CONVOCA UNHA ASEMBLEA PARA PRESENTAR A PROPOSTA DE CONSTITUCIÓN DUNHA FRONTE AMPLA PARA AS ELEICIÓNS EUROPEAS 2014

Será o sábado, 5 de Outubro as 18.00 H. en Exposalnés – Cambados, e na mesma participará o Comisionado nacional de Relacións Políticas de ANOVA, Luis Eyre Dieguez

As agrupacións locais de ANOVA Irmandade Nacionalista do Salnés teñen convocada para este sábado unha Asemblea coa finalidade de presentar a proposta de configuración dunha Frente Ampla de cara as próximas eleicións ao parlamento europeo do 2014.  Terá lugar as 18.00 Horas no Edificio Exposalnés – Cambados e como todas as asambleas de ANOVA será aberta non só a militantes e simpatizantes, senón a todas aquelas persoas as que lles interese coñecer a proposta ou aportar o seu grao de area para colaborar nunha alternativa política e social contra as políticas dos gobernos actuais.

Para a presentación da proposta aprobada pola Coordinadora Nacional de ANOVA participará na Asemblea, Chelo Martinez, deputada de A.G.E., e Luis Eyre Dieguez, Membro da Dirección Permanente Nacional e Comisionado de Relacións Políticas.  Eyre e un dos membros de ANOVA que está a participar nas xuntanzas con outras organizacións políticas as que se lle presentou a proposta de constitución da Frente Ampla.

Como se explicita na proposta aprobada (preme aqui) a Frente Ampla pretende ir incluso máis ala do obxectivo de conseguir representación no parlamento europeo, senón tamén ter a oportunidade de intervir e incidir no proceso de fin de réxime cara a un novo ciclo político que está a ser propiciado polo activismo da cidadanía.

A crise económica e os seus efectos sobre as maiorías sociais pola xestión que daquela se está a facer; o desemprego e os recortes en dereitos e liberdades sociais; a situación da UE secuestrada por institucións "tecnocráticas"; a posibilidade da fin do réxime nacido da transición, e os efectos que todo iso ten nunha Xunta de Galicia e demais institucións autonómicas cada volta máis inservíbeis para a cidadanía galega, reclaman que traballemos combinadamente en todos eses ámbitos.

ANOVA mantivo dende a súa creación unha aposta nídia pola unidade de acción tanto das forzas nacionalistas como da esquerda e dos movementos cívicos. Esa aposta e a que lugar por exemplo nas últimas eleicións a coalición eleitoral Alternativa Galega de Esquerdas.  O que se pretende agora e impulsar un proceso de creación dunha Fronte Ampla nunha primeira instancia a nivel da nación galega como suxeito político soberano, e posteriormente traballar para a constitución dunha plataforma integrada por forzas similares do resto do estado español. Isto concretouse nun acordo que se resume nos dous puntos seguintes:

1. Facer un chamamento a todas as forzas políticas galegas nacionalistas e da esquerda rupturista, aos movementos cívicos, para dialogar e conformar un acordo de unidade de acción electoral para as eleccións europeas baixo a fórmula dunha fronte ampla non excluínte.

2. Facer un chamamento ás organización políticas, e tamén ás plataformas e organizacións cívicas das outras nacións, para que baixo o principio do máximo respecto á autoorganización de cada unha delas, constitúan o seu suxeito político plural disposto a partillar connosco nunha coalición electoral que teña como propósito común a loita pola fin do réxime, a ruptura democrática e a democracia real.

OUTROS TEMAS DA ASEMBLEA COMARCAL

Os asistentes a Asemblea de ANOVA tamén terán ocasión de coñecer os posicionamentos de ANOVA – Salnés sobre diversas problemáticas de ámbito comarcal como é a situación dos emigrantes retornados, aos que a Axencia Tributaria lles está a mandar Expedientes sancionadores pola non declaración das súas pensións do extranxeiro; ou o caso dos mariñeiros propietarios de embarcacións menores con problemas para regularizar as súas embarcacións. Dende ANOVA xa manifestamos públicamente o noso apoio as demandas destes dous colectivos. 

Xa no nivel organizativo, debatirase a situación da organización a nivel comarcal e elixirase a persoa que se incorporara a Coordinadora Nacional de ANOVA en representación da área comarcal do Salnés.

Anova – Ogrobe considera nefasta a xestión da concelleira Ayda Filgueira

Califícana de “incompetente”, que non so é incapaz de cumprir o seu programa, senón incluso  de manter os servizos que xa tiña o Concello, e que debería explicar porque dende a súa área sempre se beneficia a mesma persoa – empresa.

Jean Cocteau dixo “Un vaso medio baleiro é tamén un vaso medio cheo, pero unha mentira a medias, de ningún modo é unha media verdade”. Así e como vemos dende ANOVA - O Grove a intervención da Concelleira Aida Filguiera o pasado xoves no pleno e os reportaxes-entrevista de autobombo que sairón nos medios de comunicación ao respecto…

A realidade e que nos atopamos diante dun fraude, primeiro aos seus votantes por incumprir o seu programa eleitoral, e segunto a todos os cidadáns, porque estamos diante dunha concelleira inoperativa, que non e capaz de manter sequera todo o traballo que se estaba a facer nas súas áreas, nin de defendelas diante dos recortes que lles imponen tanto dende a Xunta de Galicia como dende seus propios socios de goberno.

A situación agrávase cando falamos dunha das 3 concellalías liberadas, que levaba meses desaparecida, nun momento de enorme afección da crise económica, do desemprego, xusto cando máis falta fan esas redes de protección que son os servizos sociais, a atención a muller, aos drogodependentes, aos enfermos. Dende ANOVA estamos convencidos de que se non fose pola enorme profesionalidade dos técnicos e empregados do Concello do Grove a situación de descontrol e descoordinación seria aínda moito peor.

Por que un fraude aos seus votantes: porque no programa eleitoral falaba de “Centro de Día” “de xestión directa do Servizos Sociais” e “regular a participación cidadán”, de “orzamentos participativos” de “Plan municipal de Atención a Discapacidade” de “defensa do Centro de Saúde” e non só nada se fixo, senón que incluso se tomaron decisións en contra. Debería explicar porque enganou as traballadoras do Servizo de Axuda a Domicilio, meténdoas nun caleixon sen saída, para terminar privatizando o servizo; ou porque agora parece que o Concello abandona definitivamente o proxecto de Centro de Día e semella que incluso tamén o do novo Centro de Saúde.

Falamos de engano aos veciños do Grove, porque máis ala da propaganda, o balance desta Concelleira é bastante pobre e con consecuencias negativas: Lembremos aquela proposta que afortunadamente caeu en saco roto, de integrar o Centro de Información a Muller nun servizo mancomunado con Cambados, que suporia na práctica pechar o CIM municipal e que só se aténdese no Grove uns días a semana ou mes…; ou porque segue sen facerse a avaliación do Plan de Igualdade Municipal; porque se perdeu a subvención de Dinamización, ou porque a axente de igualdade en vez de facer o seu traballo adícase a ser a súa secretaria particular…

Tamén debería explicar por que é incapaz de coordinar o traballo das distintas áreas e técnicos de Servizos Sociais que ten o Concello, ata tal punto que precisa contratacións externas para traballos que podían ser desempeñados por traballadores do propio Concello.

Ou algo moi grave, como logo de 20 anos de funcionamento, se suprimiu o Servizo de Prevención das Drogodependencias, despedindo a Técnico encargada de desenvolver as actividades nos colexios e institutos do Grove… mentres noutros concellos veciños manteñen este servizo buscando outras vías de financiamento. E incluso como permite abrir a porta a posibles recortes ou ao peche do SPAD.

Sobre área de mar pouco hai que decir, a pesar de ser a súa “especialidade”, porque nada se fixo pola súa parte; simplemente apropiarse das xestións realizadas por outras áreas do Concello e nin sequera algo tan simple como mostrar o apoio aos mariñeiros con embarcacións de artes menores que están a ter problemas para regularizar as súas embarcacións.

En conclusión, un bluf… que considera que a resolución as problemáticas sociais que hai na sociedade resolvénse con estrevistas sobre o fondo de armario, con publicidade ou con xornadas sobre gastrosexoloxía; Aida Filgueira marcharase co o triste honor de ser a primeira Concelleira que recorta e suprime servizos nas áreas de sanidade e servizos sociais no Grove. Triste balance…

HAI UNHA CONCELLEIRA NA SOMBRA??

Deixamos para o final un tema delicado… e é que no Grove moita xente pensa que HAI OUTRA CONCELLEIRA NA SOMBRA…. Que non cobra pero beneficiase enormemente do traballo destas áreas….

Aida Filgueira debería explicar cal é a relación que ten con determinada profesional e a súa empresa, para beneficiarse de todo tipo de contratacións, tanto laborais como a través da sua empresa, realizar xornadas, impartir charlas, atender persoas e incluso utilizar os medios e o despacho da propia Concelleira como se fosen os seus propios. E decir que igual vale para un roto que para un descosido…

Unha úlitma cousa, se esta Concelleira fai todo esto ou non fai e tamén porque está amparada por un goberno, que non ten a valentía de tomar decisións, e prefire deixar caer todo o traballo dos servizos sociais do Concello con tal de manter o pacto de goberno coste o que coste. Polo tanto o PP e complice e tan culpable como AMECA….