AGE denuncia a soberbia, a ignorancia e o discurso triunfalista da Xunta mentres arde o monte Pindo

Alternativa Galega de Esquerda (AGE), a través do seu deputado Antón Sánchez, denuncia “a soberbia, a ignorancia e o discurso triunfalista da Xunta” xusto cando está arder o monte Pindo, lugar de enorme importancia natural e símbolo nacional galego. “Sentimos raiba e indignación”, afirmou Sánchez esta mañá, “ante a soberbia e a ignorancia do señor Núñez”. “O Goberno fixo un discurso triunfalista sobre os lumes e focaliza o problema nos incendiarios”, engadiu, “que é como se o ministro de Interior descargase a responsabilidade no aumento de delincuencia nos delincuentes”. Para AGE, a política forestal da Xunta é inexistente e, polo tanto, absolutamente irresponsábel. Que haxa ou non lumes nos montes, sinala Sánchez, “depende unicamente das condicións climatolóxicas. Isto é intolerábel”.

“O único que fai o presidente é propaganda e publicidade, e a conselleira [de Medio Rural, Rosa Quintana], amosar a súa ignorancia”, explicou o deputado de Alternativa, “e ao PP só lle interesa gañar as súas batalliñas”. No debate do pasado martes, no pleno do Parlamento, a responsábel de Medio Rural “deu datos falsos e non abordou os cambios en profundidade que precisa o modelo agrario e forestal en Galicia”. Segundo Antón Sánchez, o despoboamento do rural atópase entre as causas centrais das vagas de lumes que cada ano arrasan os montes do país. “A Xunta debería comezar por facer cumprir a lei de prevención de incendios forestais”, concluíu o parlamentario de AGE, “porque hai centos de denuncias por repoboación forestal e plantacións ilegais que fican sen tramitar”.

O señor Núñez agóchase e non explica no Parlamento o financiamento irregular do PP

“Unha vez máis vostede, señor Núñez, agóchase da opinión pública e do Parlamento e non explica aos cidadáns o financiamento irregular do PP de Galicia”. Sobre este eixe, a viceportavoz de Alternativa Galega de Esquerda (AGE) Yolanda Díaz esixiu ao presidente da Xunta –na sesión de control do pleno do Parlamento- aclaracións sobre o financiamento irregular do seu partido, que figura entre os papeis do antigo tesoureiro do PP Luis Bárcenas. E que inclúen doazóns de empresas superiores á contía legal -60.000 euros- cando Alberto Núñez Feijóo xa presidía a organización. “Vostede contrata con esas compañías pero non dende que preside o Goberno”, espetoulle Díaz, “senón dende que era amigo de Marcial Dorado”.

Mentres o señor Núñez volvía, máis unha vez, escapulirse e non respondía ás cuestións formuladas por Alternativa, Yolanda Díaz lembráballe algunhas das súas hipócritas declaracións. “Vostede dicía que Bárcenas era unha mazá podre no partido, pero o que está poder é a cesta enteira”, afirmou. Porque amparar, e beneficiarse de, o financiamento ilegal significa “perverter a democracia”, rachar as regras do xogo e construír hexemonía política –como fixo o PP- a forza de trampas. Núñez escudouse n que falará cando llo pida un xuíz, o que indignou as bancadas da oposición. A viceportavoz de AGE preguntou daquela: “Cando vai contar nos tribunais o que aquí non se atreve?”.

Para Alternativa, o señor Núñez non é un presidente lexítimo. As súas amizades perigosas con contrabandistas e o financiamento irregular que figura nos papeis de Bárcenas e sobre o que o Partido Popular construíu parte da súa hexemonía electoral, e política, demóstrano. “O único que amosou vostede no Parlamento hoxe é que lle importa todo un bledo”, pechou Yolanda Díaz, “e repugnante é o aparello de financiamento irregular do PP galego”.

A nova lei do emprendemento do PP eximiría de licenza municipal a proxectos como Corcoesto

Antón Sanchez, deputado de A.G.E.

Alternativa Galega de Esquerda (AGE), a través do seu deputado Antón Sánchez, denuncia que o denominado proxecto de lei “do emprendemento e da competitividade económica de Galicia”, publicado no Boletín Oficial do Parlamento de Galicia o pasado martes, non é máis que un texto neoliberal extremista e que resume toda a propaganda de desregulación das políticas que conduciron á actual crise económica e social.

 Pero non só iso. Segundo expón Sánchez, “o Goberno do señor Núñez non dá puntada sen fío e, coa nova norma na man, proxectos mineiros e ‘aproveitamentos’ hidroeléctricos como as minicentrais non precisarían licenza municipal”. É dicir, de saír adiante, un proxecto colonial e depredador como a mina de Corcoesto aforraría autorizacións e trámites e tería aínda máis doada a súa instalación no país. “O texto reduce o control municipal á

I Romaría de verán de ANOVA – O Salnés

Dende Anova IN da comarca do Salnes queremos invitar a todolos simpatizantes e militantes a I Romeria de verán que se vai celebrar o próximo Domingo 8 de Setembro na Illa de Arousa.

O máis importante, ter a oportunidade de pasar un día xuntos todas as persoas que traballan e teñen ANOVA como o seu referente en política, e tamén coas nosas familias. Queremos que sexa tamén un día para compartir coas nosas familias, e que vexan en primeira persoa eso que lles contamos do bo ambiente e rollo que hai en ANOVA – Salnés.

Animadevos a participar, que é un moi bo xeito de acabar o verán e retomar o pulso da vida política que hai moito traballo que facer….

I Romaría de verán de ANOVA – O Salnés

Illa de Arousa – Domingo 8 de Setembro.

·         11.00 H.:  Visita guiada ao Centro de Interpretación da Conserva da Illa de Arousa e ao muelle de pau

(o punto de encontro e partida será diante do Edificio do Concello da Illa, na Rúa de Palmeira {ao outro lado do paseo do Cantiño})

·         12.00 H.:  Proxección do documental “Doli, doli, doli…. coas conserveiras” sobre o traballo das mulleres da conserveira Odosa, da Illa e a loita que levaron a cabo para conseguir o recoñecemento do tempo traballado.

·         13.00 H.:    Roteiro ata o Mirador do Santo (no Con do Forno), o punto máis alto da Illa.

·          14.30 H.    COMIDA de confraternidade na Área de lecer da Praia Area da Secada.

o  Esta reservado un menú, na carpa do Chiringuito existente na propia área de lecer, por un prezo de 10 Euros persoa (Mexillóns; Empanada e Xamón asado con patacas fritidas e ensalada. Inclúe pan, refrescos e café [non postre]).

Anova aposta por un cambio de modelo contra os incendios

Antón Sánchez García, responsábel de Medio Ambiente de Anova, expuxo os argumentos a prol dun cambio profundo das políticas para o rural como solución á lacra dos lumes. Débese incrementar o esforzo en prevención, promover a educación ambiental e camiñar cara un modelo de extinción profesionalizado e simplificado.

Con respecto aos lumes deste ano, Antón Sánchez acusou á Xunta de tratar de xeito "infantil, mentireiro e manipulador" un problema estrutural.

1. Galiza ten o 7,7 % da superficie forestal do Estado e prudúcense no noso territorio o 45% dos incendios. O factor diferencial, evidentemente, non é o número de incendiarios, senon que ten causas estruturais evidentes, como afirman todos os expertos: ausencia de ordenación do territorio, desertización do rural, aposta por un modelo baseado na trituración de madeira de baixa calidade, baixo valor e, por tanto, baixa rendibilidade do monte, etc.

2. O PP, que gobernou 27 de 32 anos de autonomía, é o principal responsábel da situación do rural e do monte galego. A ausencia de políticas de viabilización do rural do PP é a principal causa da lacra do lume.

Esta é a única idea que ten feijoo do
 que debe ser a loita contra o lume

No 1992 apróbase un Plan contra incendios, consensuado por todas as forzas do Parlamento, para desenvolver unha política integral do monte que tivera en conta todos os obxectivos antes expostos para mudar as condicións estruturais que causaban os lumes e que impedían a explotación rendíbel do monte.

A consecución destes obxectivos debería de ser que cada vez se gastase menos en extinción e máis en prevención. Pois ben, sucede ao contrario: a única política do PP é a extinción, a manipulación, e a mentira. O único argumento é que a culpa é dos incendiarios, tratando de desviar a atención da súa ineptitude. "Cómo si un ministro de Interior lle bota a culpa do aumento da delincuencia aos delincuentes".

3. Aínda así, e a pesar de que todos os anos se gastan unha media de 90-100 millóns de euros en loita contra incendios, o operativo é cada vez menos profesional, menos eficiente e menos coordinado, e voltamos ao sistema caciquil de contratación nos concellos.

Até 11 entidades/organismos/empresas diferentes poden actuar nun lume. Seaga, funcionarios da Xunta, Tragsa, brigadas municipais, UME, Protección Civil, bombeiros públicos, privados, etc. Este ano, non se realizaron practicamente traballos de prevención, xa que os que o tiñan que facer foron contratados na súa maioría en agosto.

Feijóo e Rosa Quintana, non teñen vergoña (saben que o que din é mentira), mentireiros (trucan os datos) e manipuladores (queren por o foco só en quen prende o lume) cando fan eses discursos triunfalistas. Non asumen a súa responsabilidade nos lumes, cando estando na oposición tiveron un comportamento "canalla" na utilización dos lumes como arma partidaria (lembremos a famosa foto da mangueira).

4. ANOVA manifesta que so cun cambio profundo nas políticas do rural terá solución a lacra dos lumes. Revitalizar o rural evitando a desertización, ordenar o territorio, encamiñar o modelo cara un monte cunha funcionalidade múltiple e cara a explotación de madeira de alto valor engadido. Se o monte deixa de ser un problema para ser percibido pola poboación do rural como unha oportunidade, mellorará substancialmente a situación (as zonas onde o monte é rendíbel arden menos ou non arden).

Incrementar o esforzo en prevención (un exemplo do que non se debe de facer é retirar as subvencións ás razas autóctonas que serven para pastorear no monte) e promover a educación ambiental na poboación e camiñar cara un modelo de extinción profisionalizado e simplificado, evitando a multiplicidade de entes.

DESPOIS DO DÍA DA GALIZA MÁRTIR...

O pasado venres 16 de agosto, a asemblea de Anova – Irmandade Nacionalista en Ogrobe realizou un acto en lembranza de Alexandre Bóveda con motivo do Día da Galiza Mártir. Pensamos que esta é unha data que dende o nacionalismo de esquerdas debemos recordar sempre para que a loita que como sociedade debemos dar perante os poderes que nos atenazan e esmagan , continúe a ter o significado que debe ter.

Neste acto, no que tamén lembramos ós milleiros de galegas e galegos cruel e inxustificadamente asasinados polo franquismo, participaron Anxo López, militante local; Bernarda Rubianes, mestra e membro da Coordinadora Nacional de Anova – Irmandade Nacionalista; Martiño Noriega, coordinador nacional da nosa formación política; e Raul Asegurado, mebro de Anova e participante en diversas iniciativas de índole social e de banca ética.

Os tres últimos expuxeron respectivamente o significado da figura de Bóveda no ámbito nacional galego, de fronte política ampla e de cariz económico e persoal. Rubianes fixo unha breve disertación dende o galeguismo de finais do S. XVIII ata os tempos da II República española. Destacou o traballo de Bóveda dentro do Partido Galeguista como continuador da liña política e cultural do galeguismo e do nacionalismo do noso país.

Polo seu bando, Martiño Noriega chamou ás alianzas entre as diferentes forzas políticas e xentes de esquerda de Galiza para, dentro da dinámica que se dea ben no noso país, ben no Estado español ou ben en ámbitos máis amplos como podería se-la Unión Europea, loitar contra a plutocracia financeira e a dereita máis reaccionaria que está levando á nosa sociedade cara a catástrofe, sempre en aras do beneficio dos que máis teñen.

Para rematar a quenda de intervencións, Raul Asegurado baseou a súa en dous aspectos. O primeiro foi o compoñente emotivo, pois os seus avós tiveron relación con Bóveda e padeceron dun xeito bastante cruel, as consecuencias da sublevación militar de 1936. O segundo aspecto da súa intervención estivo baseada na necesidade de ser donos do noso destino. Empregando a lóxica republicana que dende Anova – Irmandade Nacionalista reflectimos nos nosos principios ético – políticos, lembrou que a soberanía concreta no eido económico significa ter capacidade de non dominación dun ente externo. A figura de Bóveda tamén é recordada neste aspecto, pois el chegou a deseñar un sistema facendístico galego, co cal, o noso país, sería dono do seu desenvolvemento económico sen ser dependente de factores externos.

Para remata-lo acto, as máis de corenta persoas asistentes dirixíronse cara o inicio da rúa Alexandre Bóveda para, diante dun monumento na súa lembranza, canta-lo himno galego e realizar unha ofenda floral.

Dende a asemblea de Anova – Irmandade Nacionalista en Ogrobe queremos parabenizarnos da boa acollida que tivo esta acto. De tódolos xeito, días como o da Galiza Mártir non deben ser patrimonializados por niguén, pois en palabras da Irmandade Galega (os galeguistas no exilio americano), "ficará consagrada na ialma do pobo galego como xusta eisaltación dos que deron o seu sangue e a súa vida pola nosa sagra Terra e ficará como eterna maldizón para os traidores a Galicia".

POR AQUÍ NON PASA A VOLTA

En tempos de grande crise económica na que desde tódolos niveis administrativos e políticos, o PP e os seus aliados (no noso concello o PGD de Fredy Bea e A Meca de Ayda Filgueira) e en certa medida tamén o PSOE nos venden a necesidade de axustes, de sacrificios e de reestruturacións, para o poder faise necesario aplicar a vella máxima de “pan e circo”.

Non fai falla máis que mirar ó noso redor!

Perante os escándalos de corrupción protagonizados polos Barcenas, Rajoys, Cospedales, Feijoos e cia. , perante os escándalos ligados á monarquía, perante ós constantes e rotundos fracasos nas políticas económicas de Feijoo (desaparición das caixas, aumento da débeda autonómica,e fiscal, falta de crédito para os cidadáns...), etc. o poder so sabe darnos algo para que esteamos entretidos noutras cousas e non protestemos demasiado. Ou acaso o adianto do calendario futbolístico é casualidade? Ou acaso que tódolos días da semana teñamos fútbol é casualidade? Ou acaso o “problema” de Gibraltar non é outra cousa que unha cortiña de fume? Resulta evidente a resposta a estas preguntas.

No que nos atinxe ós mecos e mecas, e tamén ó conxunto dos galegos, temos un extra deste “pan e circo”: La Vuelta a España.

Resulta que a Deputación de Pontevedra, co seu presidente á cabeza, viron oportuno desembolsar certa cantidade de fondos públicos para atraer á empresa organizadora da rolda ciclista. Tanto deberon ofrecer que os organizadores decidiron afinca-la Vuelta case que unha semana en territorio galego.

Desde Anova – Irmandade Nacionalista en Ogrobe, non podemos máis que valorar dun xeito neutral o paso da Vuelta a España polo noso concello e polo noso país, do mesmo xeito que a maior parte dos holandeses o tiveron feito edicións atrás cando a rolda ciclista partiu de territorio holandés. E tamén porque o deporte en si mesmo é positivo. A cuestión é outra!

Constantemente dísenos dende diferentes instacias que non hai cartos para gastos sociais, para promoción do deporte e da cultura galega, para a investigación... para tantas e tantas cousas que fan que un país non reste hipotecado por décadas.

Pois ben, todo semella que era mentira, ou cando menos media verdade, pois o Presidente Louzán converteu o chumbo en ouro e conseguiu o inimaxinable: o paso da Vuelta a España pola provincia. De verdade este feito é un logro? Pensamos que non.

Os carteis que polas estradas arousáns e galegas amosan que “por aquí pasa a Vuelta” non fan máis que enmascarar o deterioro dalgunhas das nosas infraestruturas deportivas ou a máis terrible inexistencia doutras.

Non tería sido mellor empregar eses fondos públicos na mellora desas instalacións? Non tería sido mellor empregar eses fondos en promoción real do deporte galego e das súas seleccións? Non tería sido mellor non facer esta ostentación de poder económico lúdico – festivo mentres moitas persoas no noso entorno están a pasar fame? Deixamos estas preguntas para que cada quen as valore baixo os seus propios esquemas.

Xa para rematar, quen se beneficia realmente do paso da Vuelta 2013 polos nosos concellos? Certamente os afeccionados ó ciclismo, que verán de preto ós seus deportistas favoritos. Algúns hostaleiros, que recibirán os equipos e a todo o circo que acompaña á rolda ciclista, tamén. Pero, o sector mexilloeiro sairá beneficiado? Con esta edición, a Deputación pretende dar un impulso á comercialización do mexillón de Galicia (a pesar do deseño da mascota), mais que importa que aumente o seu prestixio se nin tan sequera se pode etiquetar como tal despois de que os partidos conservadores na UE o impediran meses atrás no Parlamento Europeo? Certamente so se pode definir isto como incompetencia de Louzán e cia, que de seguro tamén sairán beneficiados dalgún xeito...