NEPOTISMO E FALTA DE ÉTICA NO PP DE OGROBE E NOS SEUS SOCIOS DE GOBERNO

ANOVA – IRMANDADE NACIONALISTA EN OGROBE DENUNCIA A INDECENCIA QUE SUPÓN QUE O GOBERNO TRIPARTITO USE O CONCELLO COMO AXENCIA DE COLOCACIÓN PARA FAMILIARES E AMIGOS.

Fai uns días publicábase nun portal de información local, un alarde de cinismo máis ao que xa nos ten acostumados o Goberno municipal, no que xustificaban a amortización de varios postos de traballo de limpeza, para non ter que subir a taxa de lixo, cando no mes de setembro de este mesmo ano aprobaron no Pleno municipal, e en solitario, unha suba de esta taxa nun 12%.

Nun pobo onde a índice de paro supera o nivel estatal, este feito considerámo-lo un despropósito por parte do Goberno de Miguel Ángel Pérez, e máis cando fai uns día aprobaron concederlle unha dedicación exclusiva a unha Concelleira, famosa pola súa inactividade, có único fin de

pedir unha excedencia no seu traballo e evitar un traslado laboral. Cambio de status que lle suporá un aumento de 16.000€.

Dende a Asemblea de Anova – Irmandade Nacionalista en Ogrobe consideramos ó Goberno municipal totalmente “resignado” a que este problema do paro no noso pobo só atope respiro nos meses de verán, cando dende Anova estamos ofrecéndolle alternativas á creación de traballo estable e para todo o ano, como é a proposta do Centro de Día no Sanatorio da Lanzada; pero esta resignación non é para todo o mundo, xa que hai unha  serie de persoas que si atopan respaldo dende o Concello e nalgunha ocasión á costa dos fondos municipais.

CASUALIDADES E CURIOSIDADES

Semanas atrás estívose a informar na prensa que a filla do Alcalde, Alma María Pérez Aguiño, esta nunha situación privilexiada para optar a un posto dentro da Deputación de Pontevedra no que so superaron a primeira proba da oposición provincial de Administrativo C1 tres persoas, entre elas a nomeada e cunha nota que supera en 5 puntos ao segundo de tres clasificados. Non dubidamos da cualificación de esta persoa para obter esta praza pero é que ultimamente estanse a dar moitas casualidades de persoas vinculadas ao Partido Popular de O Grove que atopan rédito laboral na Administración local ou provincial. Que a amiga persoal da Concelleira de “Benestar”, Mónica Novas Dios, que leva a cabo varias actividades para o Concello que non pasaron por ningún tipo de concurso público, o posto no Gabinete de Comunicación do Concello de Ribadumia, da Concelleira de Educación, Laura Besada, o traballo nun organismo dependente da Xunta do Concelleiro de Facenda, Juan Callón, ou o troco de persoal, nada máis chegar ao poder o PP, da persoa encargada de preparar a comida @s miniñ@s na Gardería Municipal, traballo que desempeña unha familiar directa do Alcalde, non son máis que algunha das casualidades que se dan nestes tempos, no que o mercado de traballo está moi limitado.

Outro caso curioso, é o do xenro do Alcalde. Á nosa formación cónstalle ao menos dúas dema

ndas laborais ao Concello na que a súa defensa foi encomendada a un tal, Alberto Gallego Rivera, avogado con bufete en Vilagarcía de Arousa, sobriño de Rivera Mallo, senador polo PP e ex-alcalde de Vilagarcía de Arousa. Curiosamente, este avogado, Gallego Rivera comparte despacho profesional cunha persoa que Miguel Ángel Pérez coñece moi ben: o marido da súa filla, Martin Serante Álvarez, ex-responsable do Gabinete de Rafael Louzán que compaxina a súa profesión de avogado coa de Concelleiro no Concello de Ribadumia. Ademais, e seguindo coas curiosidades, ningunha das especialidades xudiciais que ambos letrados publicitan (Civil, Penal, Familia, Mercantil, Tributario e Sucesións) concordan có obxecto das demandas no que o Concello de O Grove está inmerso.

Por se fora pouco, nos recentemente aprobados orzamentos do Concello de Ogrobe para o ano 2014, atopamos unha partida de 80.000€ que se adicarán a sufragar os gastos xurídicos dos nosos representantes. Coñecida é a polémica que este tipo de gastos está a causar entre a cidadanía, que ve como un dos socios de goberno do PP protagoniza escandalosas actuacións que despois rematan nos xulgados e, semella, temos que pagar entre todos.

A Asemblea de Anova – Irmandade Nacionalista en Ogrobe considera que estas casualidades e curiosidades, deben ser explicadas de maneira inmediata, polo Alcalde do Grove, xa que son “sospeitosas” de enchufismo e non concordan coa filosofía de “transparencia”, “austeridade” e “honradez” que promulgan a voces sobre a súa xestión.

As persoas que militamos ou simpatizamos con Anova Ogrobe, somos cidadáns que participamos na política, por considerar que “existe outra maneira de facer as cousas”, polo que nos vemos na obriga non só de propoñer actuacións que consideramos mellorarían a calidade de vida dos nosos veciños e veciñas, senón tamén a denuncia de todos os actos que nos parezan propios de réximes pasados como o caciquismo, o despotismo ou o  autoritarismo, moi lonxe da democracia participativa que defendemos.

Seguiremos informando...

Xose Manuel Domínguez.
Responsable institucional Anova – Irmandade Nacionalista en Ogrobe.

XA É NADAL NO CONCELLO DE OGROBE!

MÁIS MULTAS E MENOS INVERSIÓNS SON O REGALO QUE O TRIPARTITO LLE TEN PREPARADO Ó POBO DE OGROBE.

Nestas datas, moitos galegos e galegas collerán o seu coche e encamiñaranse a diversos lugares para xuntarse co resto da familia e gozar dunhas felices festas. Recomendámoslles que teñan coidado nas estradas, pois é sabido que en tempos de crise, o Estado e o Goberno do Partido Popular están pendentes dos límites de velocidade para que os ingresos públicos non se resintan tanto.

No Concello de Ogrobe teñen a mesma ideoloxía. Pretenden recadar uns 120.000€ durante todo o ano só en multas de tráfico. En vez de favorecer unha maior actividade económica para que reverta nuns maiores ingresos por impostos progresivos que graven máis ós que máis teñen, ou ideando sistemas de aforro e eficiencia económica no seo da administración local, o goberno de Miguel Ángel Pérez, co concelleiro de facenda como cómplice, pretenden fritir a multas ós veciños e veciñas de Ogrobe.

Por se fose pouco, o pintoresco e egocéntrico Fredy Bea, como concelleiro de seguridade cidadá, plantexou a idea de instalar uns semáforos con radar mediante concesión a unha empresa privada que levará parte da recadación. Esta privatización que so persigue unha maior recadación, terá un custe aproximado de 100.000€, é dicir, “lo comido por lo servido”. Agardamos que, cando menos, non existan vínculos entre o goberno local e a empresa concesionaria.

No entanto, os gastos en inversión, os que realmente terían unha repercusión positiva no conxunto da cidadanía son os máis reducidos das dúas últimas lexislaturas, sufrindo un descenso do 33% respecto do ano 2013 e do 99% respecto a 2009. Situando ó Concello de Ogrobe nunha posición de inoperatividade que se debe ó uso do mesmo para o beneficio propio dos integrantes do goberno local e dos seus intereses como individuos e como grupo.

Dende a asemblea local de Anova – Irmandade Nacionalista en Ogrobe non podemos máis que posicionarnos totalmente en contra destes proxectos e ideas que en tempos de crise non fan máis que restar capacidade económica ás familias e veciños que xa están a sufrir dun xeito terrible as consecuencias dun sistema capitalista devorador e despiadado.

Xosé Manuel Domínguez.
Responsable institucional Anova – Irmandade Nacionalista en Ogrobe.

Ricardo Garrido.
Coordinador local Anova – Irmandade Nacionalista en Ogrobe.

O AUMENTO DO CANON DE SOGAMA É UN PASO MÁIS NO ROUBO QUE O PP PRACTICA CO POBO: PÉREZ E CALLÓN CÓMPLICES DO DESPROPÓSITO

 UNHA POLÍTICA INEFICIENTE E CACIQUIL EN MEDIO DA CRISE FAI QUE SOGAMA LLE CUSTE MÁIS DO NECESARIO Á CIDADANÍA.

A Lei 10/1997, de 22 de agosto, de residuos sólidos urbanos da Galiza, e o Plano de xestión dos residuos sólidos urbanos da Galiza atribúen a condición de xestor nas operacións do proceso de xestión de residuos á Sociedade Galega de Medio Ambiente S.A. (SOGAMA). A Xunta, gobernada polo PP, incrementou nos orzamentos un 34% o canon do lixo, o que repercute nun aumento do canon para o noso concello de 35.000€, un aumento próximo ó 12%, mentres a cifra total de orzamentos descende nuns 12.000€.

Esta decisión vén imposta polo cambio na tarificación eléctrica do goberno central. SOGAMA con este incremento nos impostos da cidadanía pretende consolidar á conta do pobo preto de 7 millóns de euros de beneficio. Á vista do novo saqueo ao que se está a someter á cidadanía desde as institucións central e autonómica, e mesmo pretender que a xente do común pague as consecuencias dunha política medioambiental nefasta e feita para os “amiguetes” do PP, apostamos por modelos que prioricen a reciclaxe e compostaxe e crear emprego directo na zona.

Dende a institución municipal, hai que pular por tratamentos ecolóxicos (recollida selectiva de calidade, reciclaxe, compostaxe) e corrixir a recollida sen separar, así como o vertido e a incineración. Con accións neste sentido debemos pular por reverter os custos de tratamento na propia localidade con creación de emprego específico e conxelar o incremento das taxas nun momento económico tan desfavorable para a poboación. Mentres tanto, aumentar os pagos a SOGAMA é financiar a ineficiencia ambiental e a destrución de recursos e empregos.

Ademais, o concelleiro Callón, titular de facenda, así como o Alcalde, comunicaron que a desaparición de dous postos de traballo temporal no plantel do Concello debíanse á suba do canon de SOGAMA. Recentemente, este canon ven de ser suspendido,  mentres que os dous postos de traballo seguen amortizados. Hai que facer ver que a verdadeira motivación e causa desta amortización é o aumento do soldo da concelleira Ayda Filgueira ó pasar de ter unha adicación parcial a outra exclusiva. É de sobra coñecida o conflito que este tipo de situacións entre o Alcalde e os seus dous pintorescos socios de goberno xeran entre Callón e Pérez. Dende Anova – Irmandade Nacionalista en Ogrobe preguntámonos si o goberno municipal está na Casa do Concello para gobernar e favorecer o benestar do pobo ou para chupar da teta do contribuínte, desangrando a facenda municipal en beneficio propio. Unha boa mostra é a privatización do Punto Limpo impulsada por Fredy Bea e que lle custará ó pobo de Ogrobe un mínimo de 145.000€, que cobrará a empresa concesionaria do servizo.

 Deste xeito, solicitamos ó goberno tripartito que se sume á iniciativa feita por Alternativa Galega de Esquerda no Parlamento de Galicia referente á crítica ó sistema de SOGAMA e á proposta de alternativas para que a cidadanía non pague por débedas que ela non xerou. Así, instamos á Xunta de Galiza a derrogar o Plan de Xestión de Residuos Urbanos de Galiza 2010-2020 e crear un modelo de xestión local de reciclaxe e compostaxe, para impulsar a creación de emprego.

Ricardo Garrido Caneda.
Coordinador local de Anova – Irmandade Nacionalista en Ogrobe.

Xose Manuel Domínguez.
Responsable Intitucional de Anova – Irmandade Nacionalista en Ogrobe.

http://www.parlamentodegalicia.es/axenda/MostrarRexistro.aspx?numrex=0195876P 

OGROBE PERDE DEREITOS E BENESTAR CUNS ORZAMENTOS QUE SÓ BENEFICIAN INTERESES PERSOAIS DO ALCALDE E DOS SEUS SOCIOS DE GOBERNO

 A CIDADANÍA É A QUE SOPORTA O PESO DA CRISE MENTRAS OS QUE GOBERNAN VIVEN Á CONTA NOSA

A aprobación dos orzamentos do Concello de Ogrobe para o vindeiro ano 2014 seguen a pauta de pauperización e involución económica marcada polo Partido Popular. Se nos ámbitos estatal e galego os gobernos de Rajoy e Feijoo están a recurtar dereitos e liberdades, o tripartito de Pérez, Bea e Ayda non se queda atrás.

Cando PP, PGD e A Meca chegaron ó goberno municipal en 2011, o orzamento do Concello situábase nos 9.320.624,13€, namentras que o proxecto actual para o vindeiro ano rebaixa esa cantidade ata os 8.915.000€. Un descenso de preto de medio millón de euros, o que supón un 4,35%. Este descenso nos orzamentos municipais fan cada día máis difícil o correcto funcionamentos dos servizos municipais así como a prestación dos mesmos, situándose as veciñas e os veciños de Ogrobe como principais perxudicados por unha política económica nefasta e desenvolta de xeito consciente pola dereita, representada no noso pobo no actual tripartito.

A situación agrábase ó ver que a débeda do concello aumenta 140.000€ dende 2011, un 10’5%, tendencia que se ven plasmando nos diferentes orzamentos do Concello  dende anos atrás, síntoma da incapacidade dos diferentes gobernos por atopa-los ingresos necesarios para facer fronte ós gastos da institución.

Pero a xestión do Partido Popular, aliado cos dous políticos con máis ego da península, o señor Alfredo Bea e a señora Ayda Filgueira, fai que os fondos municipais se empreguen para pagar, fundamentalmente, soldos e gastos correntes, é dicir, en si mesmo. Deste xeito, catro quintas partes dos gastos do Concello están referidos a actividades con pouca ou nula repercusión económica no conxunto dos veciños da localidade. De feito, dos 8.915.000€, so un1’2% (107.000€) terán como destino inversión, dos cales, so 34.500€ terán un efectivo reflexo no conxunto da cidadanía. En definitiva, o goberno tripartito adícase a ter un Concello baixo mínimos para poder escusar a privatización de servizos como o da recollida de lixo ou a instalación dun semáforo-radar. Iniciativas ben pintorescas como é habitual no concelleiro galeguista, Alfredo Bea.

É precisamente o espírito deste persoeiro, claramente recollido na expresión “la letra con sangre entra”, o que permite que dende o 2009 ata o 2013, as previsións por multas de tráfico aumentasen un 100%. O goberno de Miguel Pérez e Ayda Filgueira, coa inestimable inspiración do coñecido popularmente como “O sheriff” considerou que había que “freir a multas” ó conxunto dos veciños de Ogrobe. Pero, a todos por igual? Por suposto que non! Dende a entrada do tripartito producíse unha caída do 73% en multas urbanísticas. O que se pode interpretar ou ben como unha deixación de funcións en materia de control ou nunha connivencia cos infractores urbanísticos no noso pobo. Dende logo, nada oportuno xusto na antesala da aprobación do novo PXOM.

Se todo isto fose pouco, a cultura, os gastos sociais, a promoción da igualdade... tamén sufren descensos nos orzamentos para o ano 2014. Pola contra, aumenta o canon de SOGAMA pola mala xestión da Xunta de Galicia, tal e como denunciou no Parlamento Antón Sánchez, parlamentario de Anova en AGE., aumenta tamén o soldo dos funcionarios de máis alto nivel do concello e que teñen que controlar, fiscalizar e asesorar ó equipo de goberno na súa xestión diaria, aumenta tamén os fondos para as liberacións de cargos ó pasar a media liberación de Ayda Filgueira a dedicación exclusiva. Resulta case pornográfico ver como no último ano do anterior goberno local (PSOE-BNG-PGD) os gastos neste concepto eran de 112.000€ e na actualidade co PP-PGD-A Meca son de 156.500, un aumento de preto dun 30% mentras os orzamentos caen en picado e os servizos para os cidadáns se privatizan.

No ámbito da cultura, resulta escandaloso o desprecio polo coidado do galego que se ve reflexado nun descenso do 90% nos fondos adicados á normalización lingüística, ou a máis que ineficaz xestión dos fondos culturais e a inexistencia de colaboración e sinerxia entre o Concello e as empresas culturais da localidade.

No campo  da acción social, o Servizo de Prevención e Asistencia ó Drogodependente sufre un recorte que a piques estivo de deixa-lo morto. Polo de pronto xa non cumprirá coa función de Prevención, pois desaparecen os postos de traballo que se adicaban a este particular. Dende  o inicio da crise económica, a Xunta de Galicia estimou, e o concello de Ogrobe aceptou, que nun pobo tan castigado pola droga como é o noso, se recurte sádicamente nesta área. Pero ademais, tanto en Muller, como en axuda a domicilio ou en terceira idade, existen descensos de fondos dende a entrada deste goberno tripartito. Novamente as políticas da dereita, do PP e dos seus socios van en contra da xente do común.

Iso si, que non se diga que non pagámo-la luz! Dende o ano 2011 incrementouse en preto de 30.000€ a factura sen establecer medidas de aforro enerxético.

E para ser quen de pagar a maior factura do lixo de SOGAMA, da luz de Gas Natural Fenosa, e dos demais grandes acreedores auméntanse os ingresos polo IBI ou pola taxa do lixo. Incluso se chegou a dicir que a desaparición de dous postos de traballo con baixa cualificación estaba xustificado pola subida do canon de SOGAMA. A realidade amosa que este canon terá que pagarse moito máis tarde do que prevén os orzamentos e que esa amortización de prazas está motivada pola suba de soldo de Ayda Filgueira.

Resulta evidente, pois, que os orzamentos propostos por Miguel Ángel Pérez non miran polo benestar dos veciños e veciñas de Ogrobe, senón pola continuidade do seu posto como Alcalde sustentado por Fredy Bea e Ayda Filgueira, concedendo subidas de soldos e concesións baixo chantaxe. Nesta liña, os 145.000€ adicados á externalización e privatización do Punto Limpo, ou os 95.000€ que custará a instalación dos semáforos con radar para seguir multando ós e ás grovenses, ou os diferentes gastos protocolarios ou financieiros para a Festa do Marisco os primeiros e para Protección Civil os segundos (sumando en total 16.000€) so se entenden como método do señor Alcalde para calmar ás partes que forman o tripartito e o sustentan na poltrona.

Ante esta repugnante situación, a asemblea local de Anova – Irmandade Nacionalista en Ogrobe apela á seriedade dos representantes públicos e a que digan ás claras diante da cidadanía que non están na Casa do Concello para gobernar e xestionar os servizos públicos municipais, senón para encherse os petos e acadar aspiracións personais. Desexamos que o conxunto do pobo de Ogrobe vexa, unha vez máis, como as actitudes caciquís e bananeras do Alcalde, de Fredy Bea e de Ayda Filgueira, están a ser perxudiciais para todas e todos nós, mentras que so se benefician “os amigotes” e eles mesmos, como cando se destinan 80.000€ dos orzamentos do Concello como fondo particular para pagar abogados.

Ricardo Garrido.
Coordinador local Anova – Irmandade Nacionalista en Ogrobe.

Xose Manuel Domínguez.
Responsable institucional Anova – Irmandade Nacionalista en Ogrobe.